Kuromi的生活日誌: 婚照之旅

婚照之旅 - DAY 3 (2010年4月5日)

哈哈哈~~~~終於都到咗我地嘅"大日子"喇!!!我就好開心喇, 噚晚都瞓得好爽, 今朝仲唔想起身添!!!

今日為安全起見, 我地去食老麥+杯咖啡提提神~~

之後直接到法巨, 我地係第一pair人到達添呀, 坐咗一陣, 事頭婆就叫咗我去試衫先, 唔啱就再改, 所有衫都好good fit, 反而係事頭婆覺得有件晚裝胸位有d鬆, 衫都唔洗徐三兩下針就釘好, 即係fit到爆, 勁呀!!!

試好衫就比人捉咗去化妝喇, 我嘅化妝師係Monica呀, 好令女呀~~~ 我地一支安瓶兩個人用, 啱啱好!!!$50/支抵到爛啦, hohoho~~

Monica仲同另一個化妝師讚我對眼夠大, 面夠尖, 係佢地最鍾意遇到嘅客人....嘢~~我倦好d頭髮就先化男友, 攪完男友就到返我化妝同set 頭。

助手CoCo已經到咗, 佢就帶男友去揀衫試衫。時間配合得好好, 好有效率!!!我地男裝都有5套衫, 同埋我地去沙灘唔會著便服 (我成日覺得點解個男主角要著便服, 但女主角就繼續著晚裝呢?? 都唔襯.....不過都係我個人覺得啫), 所以我一早同我男友諗好咗揀咩色同點襯我嘅婚紗+晚裝~~男友會著米白/全黑/全銀, 不過得3套, 跟手叫法巨比多兩條褲我, 感覺上冇咁蝕~~就算影完湖同沙灘整污糟咗都唔怕, 係咪?!

大槪9:30a.m.左右, 攝影師強sir都來喇, 我就攞咗我嘅notes比強sir睇, 路線我自己同佢地plan好埋添, 第一站先影湖-->紅色橋-->花海-->基隆渡假村"天空的院子"-->沙灘-->大舊石-->101夜景

嘩~~~景點有好多唷!!!強sir看完後就打電話....回來後我問他我想要的花花是否未開??強sir話係...咁我唯有放棄唔影, 因為我之前狂睇佢地嘅作品, 其他花出嚟嘅效果我真係唔鍾意, 再過一陣, 強sir話我想去嘅湖同紅色橋係同一個位, 個湖呢, 佢唔建議去, 因為呢幾日台北都有落兩, 石頭會比較滑太危險, 至於條橋, 強sir話路程比較遠, 撞正今日係清明正日怕會塞車去唔切基隆渡假村"天空的院子"。噢~~~點解會咁架???不過強sir話, 會帶我地去另一個紅色橋, ok!!!傾好晒, 男女裝都完成晒, Monica就幫我執埋其他衫入落大袋就出發, 我地係第一隊出發架, YEAH!!!!

話說, 我揀嘅基隆渡假村"天空的院子"係有好大付出架, 一般係台北嘅車費係HK$750, 但我揀嘅地點係基隆, 路程遠d之餘, 呢間渡假村唔比公司車入, 所以要另租的士入去, 車費要成HK$1250架, 仲有仲有呀! 呢個"天空的院子"嘅入場費仲要HK$650, 比一般一百幾十蚊入場貴好多倍.....你話我嘅主打係呢個"天空的院子"先??? 去呢個"天空的院子"要預早一兩個星期前book好, 唔係話你想即日去就去架!!!大家要注意呢~懶巴閉~

**當初我就係比呢個景吸引住...我都有同男友講過咁貴不如去第二度啦, 但我好明自己嘅性格, 萬一去咗其他地方影但效果冇我想像咁好, 我一定好唔開心同無限後悔, 所以最後都唔再諗車錢同入場費貴幾多幾多, 鍾意就去啦!!!!**

拍攝當日我地都唔得閒, 所以我地冇用自己嘅相機影過相....晒料~

來了台灣三日, 今日係最好天嘅, 冇落雨之餘仲有dddddd陽光, 真好彩~

全日嘅拍攝過程好輕鬆/愉快/攪笑下進行, 強sir好攪笑又會講笑話令現場氣氛好高漲, 助手CoCo同強sir好合拍, Monica轉妝/髮型都好快手, 髮型仲次次唔同, 除咗一款髮型我指定外, 其他都由Monica拍板, 我相信佢嘅專業, 會幫我set同化一個啱我嘅髮型同妝!!影埋夜景, 9:00p.m.返到法巨, 我地係最後一pair人返到去的, 極速換衫拆番個頭比埋車錢就閃人~

由法巨飛的去食城城每次嚟台灣都會食嘅"太和殿"麻辣火煱, 我覺得味道一般, 我唔食辣嘅都接受到~