婚照之旅 - DAY 1

婚照之旅- DAY 1 (2010年4月3日)

出發前一日, 係復活節假嘅第一日。好忙好忙! 我book咗10點鐘做facial, 12點去染髮。攪掂晒都成6點喇! 由荃灣返沙田, 食埋晚飯仲要執埋d行李, 反覆將行李清單點算又點算, 確保冇帶漏先好（每次去旅行我都好似搬屋咁）。沖埋個涼就入元朗, 去男友家過夜第二朝一齊出發!

細佬買咗新車, 佢話車我入元朗呀, 真好呀~~~不枉我咁鍚我呢個細佬! 10點前到咗元朗, good! 細佬掉低我之後, 我拉埋喼諗住行番上行人路, 但我發現每3-4尺就有一隻大型曱甴嘅????好驚呀!!!!!!點解嘅??好好好好多呀!!!可以話前無去路後有追兵, 咦~我仲著拖鞋呀, 頂+暈! 原來附近嘅餐廳清潔打烊緊, d衰嘢走晒出嚟呀, 即刻反方向走, 遠離餐廳先得.....呢個時候男友都落到嚟樓下, 定少少咁啦, 嗱嗱聲上樓先, 咪講笑~

我地撘11點幾機, 我地check in咗就去攞埋個簽證先入閘（我始終都鍾意先簽證, 費事去到唔比簽證我咪死火！）, 點解咁多人嘅??? 排完等攞, 都冇時間食早餐, 求其買d嘢就趕上機....好險~~

到咗之後, 撘飛狗巴士, 但要中途自行轉車嘅, 人生路不熟又攞住行李仲要轉車, 咪玩啦! 建議下次搭國光巴士好d!

去到酒店3點, 要5點先有房。ok~咁擺底行李再行一陣先啦~周圍行周圍食, 仲去咗買公主李假眼睫毛, 買江記華隆豬肉乾同一d小食~~~

晚飯我去咗由美容大王 Queenie 介紹嘅儂來餐廳, 真係唔錯個噃! 好鍾意個紫菜吻魚湯, 原先冇諗住叫白切雞架, 覺得成日都有得食啦, 估唔到呢間嘢嘅白切好好味好鮮, 真係有雞味架~個炒魷魚純粹係男友鍾意食先叫嘅! 至於個蟹飯先係呢餐嘅主打, 好有蟹味, 多蟹糕又多肉, D糯米飯索晒D蟹嘅香味, 好可惜太飽, 食唔晒D飯又唔可能帶走留番第二日食, 浪費晒~~~

((話說去呢間儂來餐廳有個小插曲, 因為附近冇地鐵又落雨, 所以我地撘的士過去嘅, 咁啱係餐廳嘅後門落車, 見到餐廳D人就話 "2位"。佢地安排我地坐係一個大包廂嘅中間位, 我地望下人地食乜餸啦, 發現枱枱食嘅嘢都一樣嘅?? 其中一枱仲有一對男女著得好靚化晒妝set晒頭....我同男友估, 人地係咪係度請飲呀???? 雖然啲客人冇乜理我地, 但我地自己覺得都幾尷尬, 好在係呢個時候, 有人將我地帶去另一邊坐, 嘩! 呢邊正常好多, 似番普通嘅晚市, hehe~~~))

食完飯我地搭的士直落西門町行一陣, 上次去台北冇機會夜晚行, 今次夜晚嚟到, 係好熱鬧好多人, 但賣嘅嘢就唔啱我囉~最後係街邊檔買咗兩件衫閃人~

今日嘅收獲都幾豐富~~~

 

相關網誌:

婚照之旅 - 準備