婚照之旅 - DAY 2

婚照之旅 - DAY 2 (2010年4月4日)

朝早去咗食紅燒牛肉麵, 再四圍行下就出發去法巨。

我地約咗我地2:00p.m.試衫, 之前有問過佢可否改1:00p.m.試, 佢地話要準備開舖同打掃地方, 叫我地最好2:00p.m.先去, ok~冇計啦!

2:00p.m.準時去到, 佢地話d試衫室full晒! 話d人1:00p.m.已經到咗, 叫我地出去行個圈, 4:00p.m.再返嚟! 頂~~咁當日又唔比我約1:00p.m.??? 到我揀嗰時都冇衫好比我揀啦!!!我冇要求改早d試衫就話自己黑仔啫, 咁我要求早d你又唔比, 而家就話d試衫房full晒!!!!

周圍行周圍拱, 去咗唔知邊個街市, 買咗兩包虎門米粉....再去書局打書釘, 幾經辛苦先到4:00p.m., 去到再等一陣先到我地, 我係呢個時間當然要黑個臉啦~~~

有個比較肥少少嘅女人問我有冇咩要求! 我就拎咗我預先做好嘅notes出嚟, list好晒我想要嘅款同顏色, 佢就按我想要嘅顏色再收集等我試, 原來好多款已經冇咗同比人揀咗。之前我send相比佢地叫佢留比我嘅晚裝同婚紗亦都冇同我留起, 激死人呀!!!

等多15mins先有房到我地....佢一嚟就會叫你試咗晚咗先嘅, 佢地話好多時用最多時間揀嘅就係晚裝, 花多眼亂嘛~ 反而婚紗就好快手, 因為得白色, 準新娘都只係揀款唔洗煩咩色, 就會快手好多囉。

我嘅package包5套衫, 當中有2套我會揀婚紗, 1件會grand d (即想要拖尾), 主打用嚟影渡假村時著嘅, 另1件會輕巧d (唔洗拖尾)。可惜我心水婚紗沒有了, 可惡呀!, 款式如下:-

輕巧嘅婚紗好快就揀好喇~~~但就係拖尾婚紗就試咗5,6套都冇啱心水, 我嘅要求係拖尾同上身最好有個蝴蝶結 or 有少少decorate冇咁dry就ok, 最後連冇蝴蝶結嘅都試埋但都唔啱....最後個肥姐姐再出去攞多一套入嚟, wow~~~掂喎呢套, 又KO埋!

以下嘅相係我有試過嘅衫, 亦係我幾鍾意但最後冇揀到:-

本身呢套白色蛋糕款婚紗著上去都唔錯, 我都幾鍾意架! 不過同我揀好咗嘅晚裝又係蛋糕款, 所以佢被迫釘走咗, 可憐~~

左上角嗰件淺黃色晚裝本身係我心水之一, 我都好鍾意, 由於又同我揀好嘅輕巧婚紗撞款 (仲乜我嘅喜好來來去去都差不多?!), 加上影相後個色/款唔出, 佢又要被釘走喇, byebye~~

大嗰張相呢, 其實係帶香檳金嘅拖尾婚紗, 其實我好鍾意架, 大家見到啦, 佢上身有蝴蝶結之餘, 裙襬過機後個款都好出, 但點解佢要被釘走呢...有兩點嘅, 1) 佢嘅上身嘅料好硬架, 我現場睇著到好洗衫板, 總之就怪怪地啦~~ 2) 就係個色囉, 點解要香檳金呢?! 如果係象牙白嘅話我都仲會考慮你架!!!

試到尾段, 有另一個員工帶另一pair香港客入嚟揀衫試。嘩~原來仲有人遲過我地揀衫喎....啲好嘢實比人揀晒啦! 真係要祝佢地好運呀~~

最後我揀咗:-

1) 白色拖尾婚紗

2) 白色輕巧婚紗

3) 黃色蛋糕款晚裝

4) 白底紅花晚裝

5) 深綠背心款晚裝

我揀完後, 就同你度身攞去改, 準備第二日用嘅, 好快手呢, 男友就去度身! 原來佢地冇得試衫架, 我仲未同佢揀衫個喎~~~佢地話要當日朝早再試喎, 又冇計啦~~

總結, 除咗係約試衫嘅時間安排唔好後, 其他都好ok嘅~~~

一早plan好咗, 揀完衫後就去法巨附近食"杭州小籠包", 大家可能會問, 點解唔去食"頂"泰豐, 因為上次去台北已經試咗喇, 今次想試另一間, 旅遊書介紹, 呢間小籠包嘅師父都係由"頂"泰豐出來唷, 係咪直得一試呢~~

包到反晒胃呀!!!!!!!!不過堅好食, 呢度其實係零裝修, 坐矮凳, 但好多當地人嚟食嘢架, 同埋都要等位, 得幾張枱, 但就有5,6個師父係度整小籠包, 好勁呀!

食飽飽後走人, 發覺行多幾個舖位係有間似樣d嘅分店......haha, 唯有當試當地特色啦~~

之後就去買手信, 買番上次食過嘅"裕珍馨" -- 奶油酥餅同"旺來酥" -- 鳯梨酥, 呢兩個牌子係我食過嘅最好食的, 連我同事都話正架!!!大家有機會都試下吖~

食包就慢慢返酒店, 最d瞓準備聽日嘅人生大事~~~我仲要搽指甲腳甲油同敷番個靚mask架~~~

 

相關網誌:

婚照之旅 - DAY 1

婚照之旅 - 準備