紅D疑惑

其實我仲未開工造人嘅

因為我想生龍BB，最快都要5月底先開得工！但早係3月頭已經買咗啲大陸出嘅排卵試紙，同開始量體溫！點解我咁心急？我怕自己有問題，唔想到時再晒時間左check右check嘛！

所以我特登早啲試，想清楚了解自己機能同個用法，有咩唔尋常盡快發現！希望可以一擊即中嘛，heheee 始終要有BB都唔係易事，唔係你想有就有~

每個健康女性排卵前24-48小時體內有種叫黃體激素(LH)會激增，而呢啲試紙就係幫你check個LH值幾時激增，從而推斷幾時排卵！

做法非常簡單方便：-

1）首先要了解自己個週期先，無論你個週期係幾多日都好，排卵日會係你下一次經期前14日，再推前多2-3日開始做測試直至搵到你個LH高峰值就得！

 2）只需收集小便，將試紙放入至少3秒，10-30mins內睇結果，只要出嚟嘅檢測線同對照線一樣色或者更深色，咁即代表你將會在24-48小時內排卵，咁你係呢幾內dodo就更易中喇！

**說明書話，唔好用晨尿，最好每日10點至8點呢段時間，之前亦盡量少飲水**

我試咗兩個月，但都check唔到同色，莫講話更深色！我已經密密check又少飲水，冇可能會miss咗個高峰值架！我好擔心自己有問題，因為早幾年前因為荷爾蒙有問題所以食咗年幾避孕丸調理，好怕咁樣而影響生育！我唔係怕關避孕丸，係怕自己仲有問題唔知！

大家可以睇下啲相分別係3月同4月嘅紅d結果，左邊條線係檢測線，右邊係對照線，無論點睇都係好淺色囉！

於是我上BK搵資料，原來好多人都唔會100%或以上深！大部份都50-70%粗，我嘅test result係正常嘅(應該)！嚇得我吖，我真係驚咗幾日呀，仲想抽血驗下添呀！我係網上面搵到一張相，佢嘅紅D結果都係比較淺色，但貴嘢clearblue哈哈笑排卵捧都check到LH值已到高峰。亦都有準媽咪留言覆我佢嘅紅D都只係50-60%深都一樣有BB, 所以我更加有理由相信我係健康冇問題！！！

因此我把心一橫買咗一盒哈哈笑，撞正萬寧做75折，一盒$247.5/7pcs (仲送一支驗孕捧添)，希望唔洗用晒一盒就中啦~