Kuromi的生活日誌: 9月 2011

2011年9月24日星期六

與blog友仔見面

第一次上網識朋友, 仲約出嚟見面! 俾面出席嘅有金金子, 傻婷同祖娜! 好開心呀! (big grin)

我地揀咗去朗豪坊"THE PLACE"食tea buffet, 不過要3:15pm才開始。所以約咗係麥記吹住先! 話咁快, 就吹夠鐘, 4個女仔吹吹吹, 成地都係口水呀 (drooling)

"THE PLACE" tea buffet都唔錯, 種類都算多, 比我想像中好。價錢係$188加一, 滙豐信用卡或者visa 白金卡都有85折, 抵爆!

一去到, 我同金金子就衝去攞嘢食先, 真係餓架!

我同金金子一人買兩件BB衫仔比婷同祖娜。我好開心自己可以將祝福送比人, 祝婷同祖娜心想事成!!! (love struck)

開開心心吹咗一個下午, 好正呀!!!!下次再嚟呀~~~

由發現中咗後到今日已經有10日了, 咁身體有乜變化呢??!!

如果好嚴格咁去講, 確係冇乜....比較明顯嘅有:

--- 口乾, 有時真係呢頭飲完水轉個頭條脷就乾晒。當然唔係一日24小時都乾啦, 都係不定時咁乾;
--- 便便軟咗, 呢10日入面, D便便都係軟/爛, 會有少少肚疴嘅感覺, 但都係一日一次;
--- 早排都有少少子宮扯扯下, 但呢幾日又冇喇;
--- 近呢幾日, 好似比較倦, 但係咪好勁呢又唔係喎...
--- 肚餓, 不過唔係太勁, 係比較容易餓, 尤其係夜晚, 要食一食宵夜
--- 個胸大咗呀, 至少大咗一CUP, 好正呀! (drooling)

唉...真係有D擔心架! 得呢D少少感覺, 有時都好怕, 好想知佢係咪係度! 所以我唯有得閒用紅綠D驗一驗

見到顏色有深到, 個心好似安落D定番D。不過一切都要到10月中照一照才安心~

龍寶寶, 你要乖乖呀!

9月24日體重: 114.2lbs

2011年9月23日星期五

排骨爉腸飯

秋風起, 煮番D驅寒嘅飯餸就最正架喇!

呢款飯, 都係抄媽咪架, hehe~~以前媽咪一煮, 多多都唔夠食!

煮法非常之簡單 (2人份量):-
--- $15排骨, 洗淨索乾水份
--- 用雞粉, 糖少許, 豉油, 紹酒醃30分鐘以上
--- 最後再加麻油, 生粉, 生油略醃
--- 薑絲多少少
--- 潤腸1條, 爉腸2條
--- 洗好米 (同平時煮飯一樣)
--- 跟住放排骨, 潤腸, 爉腸及薑絲上面
--- 煲飯, 完成後, 飯就會有排骨同薑絲嘅香味, 食完溫粒粒架~~

另外煮碟葉, 就三高一低啦!!!yeah!

2011年9月21日星期三

奶白節瓜魚魚湯

上次蕃茄薯仔魚湯, 我覺得味道同顏色都差咁D, 冇媽媽的味道!

今次再戰魚湯, 改用節瓜同大眼雞:-

--- 兩個細碼節瓜
--- $13大眼雞, 有九條
--- 大眼雞洗淨索乾水份, 搽少許鹽

--- 鑊加少許油, 先將魚煎香
--- 煎好後, 加薑, 加凍水 (水可以加多一點, 因為會用大火煲, 會抽走水份, 瓜亦會吸水)
--- 大火滾5mins左右, 再轉細火滾佢15mins左右
--- 同時, 可用鑊鏟將魚壓爛, 使魚味更出
--- 煲好後, 將湯轉用煲, 魚骨魚渣要小心, 不要一併倒入湯煲內
--- 最後加節瓜
--- 先試味再調味 (因為之前啲魚已經有鹽)
--- 最後都有加少許胡椒粉

嘩嘩嘩~~~真係好好味呀, 好有媽媽的味道, 我會再煲的, 好正呀!!

2011年9月19日星期一

第一次見醫生 @ 4week?day

今日去咗自己睇開嘅家庭醫生驗孕, 姑娘同醫生都好替我開心 (話晒都睇咗呢個醫生好幾年了, 已經認得我喇)。一去到先要求驗孕再等見醫生, 一路等一路都有D緊張, 怕冇咗色嘛!

今次醫生都計唔準我嘅week數同預產期, 因為我cycle亂了遲咗排卵! 醫生話我應該係9月2日(DAY30)排卵, 唔係9月3日, 不過邊日排對我都唔重要了 (batting eyelashes)

~醫生估計我而家有4week?day (忘記日數 (tongue)

) 同2012年5月26日預產期。

不過一切都要一個月後返去醫生度照一照再confirm! 醫生問我幾號行房, 我講咗我9月2日及9月4日, 醫生竟然話我咁懶都中喎....我心嗰一句好想話:"我有儲貨架!"。我梗係冇講啦, 想比人串咩~~

而家繼續每日一粒葉酸, 好似話食多一個月就可以不用食了! 叫我唔好食生冷嘢, 幫我量血壓, 磅重, 按肚, 仲話我大槪10月7日左右會開始嘔, 醫生話如果我唔嘔佢會唔開心喎...我好怕嘔架....仲問下我有乜唔舒服, 除咗口乾, 谷胸, 便便軟了, 其他都ok, 咁樣驗一驗攪一攪就$250喇....

攞晒醫生信, 假紙就去下一站 --- 威爾斯醫院!

--- 先攞張foam填個人資料
--- 連同身份證, 住址證明正本, 醫生信遞交後等叫名
--- 等咗半個鐘就叫名
--- 一張oscar預約紙 (10月31日, 因為我cycle亂, 所以我打番比我家庭醫生問下會否太早, 醫生話, 一個月10月19日後照下龍寶寶有幾大先, 如果太早就再寫紙比我改期, good呀!)
--- 一張要去到出年2月1日產檢預約紙
--- 姑娘仲叫我盡快去健康院預約產檢, 跟手去埋約咗10月27日

去埋健康院3點幾先食lunch, 就算冇...都好肚餓啦! 食完行咗一陣就回娘家同媽咪報喜喇!

媽咪教我點煲花膠湯, 仲攞埋d黨蔘一齊煲, 真係又食又拎呀, hehe

弟婦就比咗佢之前飲淨嘅孕婦奶粉比我試下味...

2011年9月18日星期日

驗一驗~

今日應該係排卵後第16日 (DAY46), 因為我9月3日 (DAY31) 的紅D由深粗變回50%, 上網睇過, 由深變淺就代表已排卵。明天星期一會去我睇開的家庭醫生驗孕, 所以今日用一用啲貴少少嘅驗孕捧, 其實就係買CLEARBLUE哈哈笑排卵捧時送的嗰支。

So far, 而家個胸係比以往谷M時再大咗D, 便便軟咗, 個人比較熱, 有時會口乾。冇眼瞓, 冇作嘔作悶, 冇好肚餓, 其實咁嘅感覺真係唔會發現自己己有"不能說的祕密"!

今日仲帶咗老公去樓上燕窩莊買花膠同嚮螺頭煲湯~ 買咗盒平平地嘅自己星期六日煲下飲, 因為貴嘢留比老爺奶奶佢地買, wakaka~~~

2011年9月16日星期五

Cycle 4 ---- Day43

話說Cycle 4 ---- Day30先深粗, 又要等多十幾日先可以驗下...9月2日 (Day30) 驗到深粗, 我係9月11日 (Day39)已經忍唔住, 我真係等咗好耐呢~~決定用紅d探一探路!

一連三日, 由Day39~41都係一樣色! 認真睇, Day41嘅紅d好似仲淺色dd, 我個心情又跌落谷低, 同老公講, 今次都係唔得架.....又要繼續努力! 我問老公佢有冇唔開心, 佢都話有... (crying)

真係好慘呀~~你話點會冇壓力喎....

9月15日 (Day43), 看到一個好消息, 一個blog友仔綠d有色, very good! (applause)

我同呢位blog友的深粗時間一樣的, 所以我又忍唔住又要驗一驗紅d, 冇色的話就唔洗再諗, 好好等M小姐搵我! 繼續去睇中醫, 我仲已經袋好對上一次的藥單, 隨時ready M小姐一到就去睇中醫!

去完洗手間, 大槪2mins左右睇睇條紅d....淺色, 同上圖差不多, 心灰時亦認命了~

點知....

過多了幾分鐘再攞紅d出嚟睇......咁深嘅??!! 真係心又亂手又陣! 唔係又排卵呀嘛 (nail biting)

??!!

send比blog友仔睇, 大家覺得好有機, 但另一邊又要叫自己冷靜, 因為我冇綠d係公司! 到下午再驗紅d, 一樣咁深, 一路叫自己冷靜冷靜! 放工先回家驗一驗綠d先~

綠d好快都有個烘, 都好容易睇到, 雖然係淺色, 心情比預期之中平靜, 出乎意料之外, 比老公睇, 佢話: "嘩! 淺到咁, 都唔可以叫線呀!"。淨係催我過奶奶嗰邊食飯, 我問佢, 你都唔開心嘅, 佢話開心咩呀?? 原來佢以為我係驗排卵呀, 頂!

當晚, 真係覺得好肚餓 (肯定唔係心理作用), 老公都好落力去買宵夜比我, 都算佢識do番少少!

Day44用晨尿驗下, 又冇深色d喎~ 不過都有d色就冇咁驚!

夜晚再驗紅綠d, 紅d好深呀, 有70%深喇, 唔講真係以為又排卵呀! 綠d就明顯有條淺線了~~~心情又再鬆一口氣!

我終於都有"不能說的秘密"了~~

心情是開心的! 特別嘅感覺係口乾, 突然發熱, 但呢d都係好輕微好輕微, 隔唔時才出現, 我都唔知係咪特徵!

我覺得我今次嘅經驗真係太緊張刺激了, 我好多謝好多謝一班blog友嘅支持/安慰/鼓勵/意見/經驗分享....等等等等~~~

現在有兩個心願:-
--- 他/她要健健康康
--- 其他blog友都快快有好消息