BB展購物

荷花攪嘅BB展我冇去到, 見到媽媽會有好多人post相攞到好多尿片同mustela, 好吸引! 但過對面海的話, 兩公婆咁去真係同買嘅差不多價錢, 如果攞埋個福袋, 真係要9:30a.m.前到達準備衝入去排隊架....好瘋狂呀!!!! 所以我只係去咗吉之島同一田咋~~



吉之島收穫

minimoto BB車雨檔, 原價$119。BB展有9折, 加JCARD再95折, 折實$101.7



一田收穫

我一連兩日去咗一田呀, HAHA~~~都係因為我用漏咗張$50 coupon.....仲要呢個月last....太無奈又要再去過。不過星期日多人好多, 仲有好多嘢已經sold out添!

呢個牌子喺媽媽會好多人介紹, 我就唔識亦都冇留意呢d product。見人話好就試下啦, 慳番d腦汁 (個腦就嚟廢架喇)

呢set $213, 佢話平咗$100仲限售400套, 有二合一沖涼加洗頭 750ml (免過水), 及送一支洗頭水 (要過水)。 

星期六去到仲有好多貨, 但星期日去已經賣晒lu~



行過隔離去mides, 又係媽媽會多人推介, 理由係made in HK, 咁我都buy嘅, 香港造QC/品質點都好啲。揀咗呢款厚少少嘅包被可以開冷氣時用, 原價$228, 會員有9折 --- $205.2。

mides冇乜特價品, 只係有一set BB出院套裝, $318有9折, 但衫仔手襪仔我有好多, 嗰張包被又簿到冇人有, 一啲都唔吸引!

其實我都有好多張二手包被, 但我都想買一張自己鍾意嘅帶出街用, 同埋整污糟咗都有得替換嘛, WAKAKAK~~~



NUK暖奶器! 一田做8折, 原價$239, 現$191.2。吉之島只有9折, JCARD再95折, 感謝日再多95折, 即最平要$194.1。點都唔夠一田嚟個8折咁乾脆咁平~~~

買咗兩個, 因為一個放喺奶奶度, 一個自己屋企用, 咁都要買兩個....不過好彩唔係好貴!

其實都好多人喺網上討論過, 用呢啲暖奶器定用熱水浸熱啲奶, 但我堅持要買暖奶器。因為我想餵人奶, 咁人奶要整番熱的話, 係唔可以太熱嘅, 最多只可以去到60度, 如果人奶過熱, 當中好多營養就會被破壞。咁如果你用熱水浸又會唔會知佢夠熱未? 會唔會過熱呢? 但好似呢款NUK暖奶器, 可以keep住40-50度, BB扭計唔肯飲奶, 又可以放番入去, 就算遲幾個字後才飲, 溫度仍然keep住40-50度, 其實都有佢嘅方便!

其實我都有諗過其他牌子, 好似AVENT但原價好似要$348同只有85折, 加上又大部啲, 咁我屋企細細, 想慳位啲就揀番NUK。另外都有考慮過TT, 但行勻全場都好似唔見咁, 即叫我唔好買啦, FINE!!!
 
好在星期六買咗先, 星期日呢個暖奶器已經sold out了!



事前點都估唔到我會買呢啲有機用品....因為有機嘅嘢一定勁貴。點知...停一停睇下就出事...喺呢個counter洗咗我$746, OMG!

呢pack $388, 中間綠色係支二合一沖涼加洗頭 250ml (免過水), 仲話可以減少頭泥...同幫助清除頭泥, 信下你先啦

左邊橙色係舒緩止痕 100ml, 啱濕疹或尿疹用嘅, 比蚊針了亦可用!

右邊藍色係支body lotion 60g, 全身連咀都可以搽, 有濕疹或尿疹都可用, 冇事冇幹可搽呢支先, 如真係有濕疹或尿疹才改用橙色嗰支舒緩止痕。

呢三支好似好勁咁! 佢話係佢地皇牌喎, 就咁落答了, HAHA~



呢兩支係孖裝 $250, 係防蚊露 100ml, 亦係我最想買及令我停留嘅原因。因為元朗都係新界地區, 我家都會有啲蚊, 龍寶寶出世又5月底, 快夏天, 奶奶又會帶佢出街, 搽呢啲有機嘢會安全又方便好多。佢好處係可以近到連眼皮都可以搽, 唔會刺眼, very good!

遲下一田都會有佢嘅貨賣, SASA同護協都有, 我估要再買都係去SASA同護協啦, 平啲嘛, HAHA~~~

呢套輕便裝$108, 有齊晒以上介紹嗰4款, 諗住放係奶奶嗰度用, 萬一佢亂咁用我都冇咁肉赤吖嘛



買滿$500, 送呢支按摩油 30ml, 話可以幫助入睡喎, 又可以落少少一齊沖涼~



同個後生女sales都幾好傾, 佢又冇乜客, 叫佢送多啲sample 比我都肯, wakaka~~~~

喺一田有象印嘅專櫃, 有好多款保暖壺做特價, 呢款要$348, 但去新城市一期二樓 (即city super嗰層)嘅生活館會員可再95折, 現$330.6, 好過冇~

揀呢款保暖壺貪佢可以單手開閂, 假設喺龍寶寶喊到拆天叫肚餓, 都唔洗因為心急心煩再攪到立立亂!

喺一田仲買咗條大毛巾, 雙面架, 一面係紗巾, 一面係毛毛, 現特價$89.9, 扣埋$50 coupon只係$39.9, 抵呀!

其實, 我仲想買多套BB床圍, 但老公竟然唔like Classic pooh喎, 真係萬萬都估唔到呀, 又話啲色好似好舊好似甩色咁! 睇中另一套, 又要$719, 好似太貴....或者遲下用埋千色嗰$300 coupon喺千色買啦....

咁多樣嘢就洗咗$1917.1 喇....好驚呀!!!!!



藥房收穫

呢pack PIGEON洗奶樽refill裝, 喺吉之島同千色賣都要$99, 好似好平咁....但其實護協只係賣$90, 大圍藥房$92。竟然, 比我喺元朗搵到一間藥房都係賣$90, 仲要得番一pack, 即買! 買到平嘢超開心, hohoho~~~



買咗咁多嘢, 其實好開心, 啲戰利品仲係放係地下仲未有時間執, 嚟緊星期六日要比心機執下, 同睇下有咩仲未買!



尚欠物資:-

PIGEON洗奶樽刷 --- 藥房
PIGEON洗奶樽液 (膠樽裝) --- 藥房
退熱貼 --- 藥房
洗衣液 --- 藥房
床褥 --- 海馬
床圍 --- 千色/一田....

相關網誌:

護協購物