BABYICON 照4D @ 26weeks4days

2012年2月26日 (星期日)

約咗2:00p.m. 去BABYICON照4D, 事前都係1516去唔去好...因為真係幾貴, 但又怕自己會後悔, 最後都係把心一橫去就去啦, 當去照結構囉....

早咗1:30p.m.就到咗喇, 但都要等到2:30p.m.先到我, 因為之前嗰個BB唔乖, 照咗好耐呀! 我就係咁食糖, 希望龍寶寶活躍啲, 多啲表情, 又早喺兩星期前開始同佢講定照4D時要乖乖, 比媽媽爸爸睇下個樣~

一開頭, 龍寶寶又係雙手遮住塊面...嚇死我呀! 唔會又好似上次照結構咁呀嘛?! 遮住.....唔好掛~

原來龍寶寶而家轉咗頭仔, 頭喺下面, 腳喺上面, 我都估佢係咁架喇, 因為近排佢踼我時, 胃同腰側都大力啲, 反而係肚臍附近嘅就細細力, 果然冇錯! 而且呢排食完嘢都好頂下, 有次仲好想嘔添呀, 好在忍得住!

過咗一陣仲係度啜手腕添, 好好味咁喎~~

去到後期, 就乖好多喇, 比多啲正面我睇, 期間仲打開咗少少眼偷眼嘢添~~~好得意呀!!!!

BABYICON嘅職員仲話龍寶寶以26週嚟講, 塊面面都算好多肉下。佢嘅叉燒包OK嗎?

仲有一雙美腿, 好似好長咁喎, 似爸爸對腳咁又長又直就好喇!

原來龍寶寶而家有2lbs10oz, 已經係大碼B喇, 好緊張添......會唔會好難生呢?!

而家BABYICON有優惠, 完成以上三個step, 送多兩張print out, yeah!!!!!

曬完出嚟, 先發覺有四張相差唔多樣喎, haha~~

整體嚟講都好開心, 又見到肥嘟嘟嘅龍寶寶, 好想快啲抱下佢呀!!!!


題外話, 事緣呢個星期日都幾忙。原先約咗金金子, 佢入開屯門, 兜路嚟我家, 攞張BB搖籃比我, 真係好感激!

大舊Bee同小寶都試坐下, 幾疏乎喎, 哈哈~~~

都未等到金金子嚟到, 我就要出發去雅培講座, 因為慒朱朱臨時有事, 由我頂上代替出席。所以我先出發, 老公交收張搖籃~~~

今次雅培講座好似比上次少咗啲禮物咁喎, 不過我最緊張嘅尿片都有
好在今次雅培講座喺旺角新世紀, 1:00p.m.完結, 仲有時間食少少嘢再過去照4D, 位置同時間都啱啱好呀! 照完4D, 又可以撘番火車去一田BB展, 順路到唔順路呀, 哈哈~~






9月24日體重: 114.2lbs / 32.5"
10月22日體重: 114.2lbs / 33.5"
11月7日體重: 115.6lbs / 33.5"
11月25日體重: 119lbs / 34-1/8" (點解突然間重咗咁多嘅???!!!)
12月4日體重: 119.2lbs / 34.5"
12月19日體重: 121lbs / 35-1/8" (噢, 已經衝突120lbs喇, 驚驚)
12月28日體重: 123.2lbs / 35-1/8"
1月13日體重: 125.6lbs / 35-3/4"(應該好快會去到130lbs...)
1月20日體重: 126.2lbs / 36" (一個星期重咗1lbs嘅??!!!)
2月5日體重: 127lbs / 36-3/4" (呢排徘徊係126-128lbs)
2月26日體重: 128lbs / 37-1/4" (呢排徘徊係127-128lbs)
(P.S. 肚圍當中有2" 為肥膏)