身體變化 (3).....

近呢幾年每晚一瞓落床都會平瞓個人一陣。有咗龍寶寶後都有繼續咁做, 初頭都冇乜嘢, 但去到12週左右, 每晚一平瞓完, 諗住轉身瞓番自己鍾意嘅姿勢, 唔郁由自可, 一郁條尾龍骨就好痛, 初初都唔知乜事, 因為寶寶仲咁細個, 冇理由咁快就腰骨痛架, 淨係覺得返工坐得太多太長時間! 但去到而家第17週都仲係咁, 而我係公司都行多咗, 但都有繼續痛, 好彩嘅係, 淨係平瞓完轉身嗰下痛, 跟住就冇再痛, 唔係就慘慘喇~

另一方面, 就係鼻塞, 又係12週左右開始, 每晚一瞓覺就塞。後來係BK都見到有媽媽都係咁, 因為荷爾蒙改變, 所以會有鼻問題。好在係, 問題唔太嚴重, 搵啱姿勢就通番, 有覺好瞓。

但去到16週, 又多咗另一個問題。就係狂打噴嚏狂流鼻涕, 好似人地大傷風咁, 頭一日仲以為自己真係傷風。開頭呢, 都係早上會咁, 下午都冇乜嘢, 但呢兩日一路打噴嚏狂流鼻涕一直到下午, 唉.....請問大家有冇方法可以改善一下呢???

相關網誌:

身體變化.....

身體變化 (2).....