第一次健康院檢查

2012年5月29日 (二)

今日同龍寶寶去健康院做檢查! 大家媽媽記得一出院就打去健康院約時間同BB做檢查呀!!!

約咗3:00p.m., 家姐陪我去。

去到好快叫名入房磅重同check黃疸, 今日龍寶寶有3.15kg / 黃18X。龍寶寶體重重得好好, 黃就普通唔算高。姑娘都有教我點樣餵人奶嘅正確姿勢同方法, 個個都讚龍寶寶啜得叻叻。

見完姑娘約埋下次見醫生, 打針同產後檢查日期就走得喇, 比想像中快~~~

今日去健康院, 一出電梯見到兩排車陣, 真係好壯觀!!!!!! 全個健康院都係大陸人, 好得人驚。嚇到我家姐死死下, HAHA~~~

髋關節

話說上次威院嘅兒科醫生檢查到龍寶寶隻左腳髋關節有聲, 好快喺6月6日安排照咗超聲波及見骨科醫生。經超聲波診斷確係有輕微嘅鬆...骨科醫生決定為龍寶寶配帶支架去加強番個關節!

同日, 去咗職業治療部同龍寶寶度身訂造。

6月13日再返去攞支架.... 展開為期三個月嘅療程

著咗返嚟後, 媽媽我試放龍寶寶喺床仔自己試瞓同玩, 見佢扭來扭去, 一抱回, 就嘔奶, 仲連鼻都噴, 嚇到我呢....心又痛。

如是者, 每晚我都唔敢瞓了, 就係怕佢嘔奶, 龍寶寶又特別鍾意伸懶腰, 每次面面都谷到紅晒!

寶寶呀!!! 今日已經著咗一星期了, 下星期6月27日返去覆診, 希望有好消息啦, 你都要乖乖呀, 時間好快過。而家咁細個著, 係治療嘅黃金最好嘅機會, 比心機呀!!!!


上網查過有關資訊, 原來呢個問題好多時發生係第一胎女嬰左腳上, 完全同龍寶寶吻合。好好彩, 龍寶寶咁快就被發現同可以配帶支架, 如果再大個先發現就好大可能要打石膏或者做手術再打石膏架喇!

所以, 今次嘅事, 對我嚟話有好有壞!

眼淚當然有流過, 確係心痛, 偏偏自己個囡又咁鍾意伸懶腰, 但而家就被限制.....真係好想快啲到9月, 到時認真咁同龍寶寶攪番個PARTY!!!!

我的龍寶寶

2012年6月17日 (日)

今日已經係days24喇, 好快就一個月! 等我post下龍寶寶嘅相比大家睇真啲先~

days0

days2

days7

days16

days24

[真實版] 走佬袋(威院)

走佬袋(威院)

 

1. 產科門診證

2. 孕婦身份證及丈夫身份證副本 <---可以不用

3. 催生約期紙 (如BB過期居留)

4.    健康院產檢紀錄 <--- 好重要, 必須跟身, 去到7樓產前房要比姑娘架!!!

媽媽用品

1. 眼鏡, CON  <--- 我有帶CON, 對我嚟講方便好多

2. 丈根, 髮夾

3. 洗面, 面霜, lotion, 眼霜, 晚霜, 化妝棉

4. 潤唇膏

5. 牙刷, 牙膏

6. 毛巾 <---可以不用

7.    廚房紙巾, 盒裝TEMPO  <--- 準備廚房紙巾如廁後用確係方便好多, 大張之餘吸水又勁唔易爛, 我每次會撕定兩格X2放喺環保袋內, vv完後就可以有得用, 唔洗又要顧上又顧下....

8. 女性濕紙巾 <---可以不用

9. 抺手濕紙巾 <---可以不用

10. 產婦衛生巾1包'非黏貼型' (入院時及剛生完時用, 因入院時若就生得, 就連內衣褲都不可穿)

11. 產婦衛生巾1包 “黏貼型”(生完配合網褲用) <--- 係威院, 唔需要理會非唔非黏貼型, 因為一樣係咁用, 一生完, 威院會用兩條好粗好長嘅棉條幫你整好。上到產後房6小時內, 姐姐會同你疴尿+同你換衛生巾, 佢會用番你自己準備嘅網褲同衛生巾。

12. 綱褲 <--- 推介PERRY佩麗牌, 因為佢係高腰款先夠力包實條衛生巾。我用過另一個牌子, 係低腰款, 塊衛生巾好易走位!因為係網褲關係, 你嗰塊衛生巾黏唔黏貼型都一樣係貼唔實條網褲架, 所以如我上面講到, 咩款產婦衛生巾都OK!

13. 沖洗器

14. 外套  <--- 醫院有外套提供, 所以我留來出院著

15. 胸圍, 瞓覺bar X 2 <---可以不用, 我都冇帶胸圍, 因為除咗探病時間, 全部都係女人嚟嘅~

16. 乳墊 <---可以不用, 因為未上奶, 一定唔會漏

17. 束腹帶 <---可以不用, 我咁多日都冇用過, 餵人奶好唔方便呢~

18. 保溫杯, 保溫瓶

19. 炒米, 陳皮

20. 拖鞋  <--- 可以不用, 因為我入院時已經係著涼鞋, 不用再準備

21. 襪 (有媽媽話, 唔好凍親對腳) <---可以不用, 我生完好鬼熱, 仲熱過陀BB

22. 相機 (後備電)

23. 電話, 叉電器

24. 收肚cream

25. 乳頭cream

26. 鎖頭

27. 小手袋 (袋證件及錢) <---可以不用, 其實都鎖咗係櫃, 都唔會再攞出攞入

28. 環保袋 
 <--- 我自己準確咗個環保袋去廁所時用嘅, 袋住網褲, 衛生巾, 廚房紙巾同埋沖涼器, 每次去廁所攞一袋入去, 掛起, 係廁所入面慢慢清潔唔怕攞漏或者跌咗落地咁煩!

BB用品

1. 0碼紙尿片一包 (NB尿片少量)

2. 濕紙巾 (抺pat pat)

3. 凡士林 <---可以不用, 因為還未熟手, 冇時間攪咁多嘢

4. 尿疹膏 <---可以不用, 因為還未熟手, 冇時間攪咁多嘢

5. Body lotion <---可以不用, 冇時間搽

6. 紗巾 x 10, 面巾 <---可以不用, 因為可以用紙巾同BB抺面就OK

 

出院用品 (親人帶來)

1. 媽媽衫褲

2. BB包被

3. 衫仔 x 1

4. 手襪 x 1

5. 襪仔 x 1

希望以上資料幫到喺威院生嘅準媽媽啦~~~~

相關網誌:

走佬袋(威院)

[改良版] 走佬袋(威院) 

生產後第三天 [Blogger Only]

2012年5月26日 (六)

今日11:30a.m.已經同老公出發過定去初生嬰兒部探龍寶寶。

好消息係, 今日龍寶寶可以出院, yeah!!!! 之於隻腳仔, 會繼續排期照照聲波同見骨科醫生, 現在只好當寶寶隻腳冇事啦....唉, 擔心屎我喇!

因為要關手機, 噚日冇影到相, 今日就帶咗部相機同龍寶寶影下相~~

今日亞姨有返工, 同龍寶寶沖涼之餘仲放咗隻公仔比佢, 話陪下龍寶寶, 哈哈~~~

見今日可以出院, 我地陪咗龍寶寶一陣, 就過番去產後房攪埋出院嘅手續同執包袱! 仲要食埋個午飯添!!! 

今日唔知做乜鬼, 落好大雨, 麻煩咗細佬同弟婦開車過來接我地走, 感謝!!!



總括:

我冇揀錯醫院! 一來我沙田大, 二來亞姨係威院BB部做 (多少都識得人掛...可以關照下)。對我來說, 威院絕對比屯門醫院好, 都係講感覺咋! 我都未去過屯門醫院, 佢比我嘅感覺就係, "做錯事就有佢份!!!" 加上家姐都喺屯醫做過, 成鬼日彈, 又話啲人廢做事方法廢....所以我未大BB前, 都決定咗返威院~~

係醫院呢三日兩夜, 都有好多吉嘅床位, 真係好難想像爆到冇晒位瞓走廊嘅情況係點~

相關網誌:

產假第一天 @ 39weeks

產假第二天 @ 39weeks2days [Blogger Only]

生產後第二天 [Blogger Only]

生產後第二天 [Blogger Only]

2012年5月25日 (五)

好快又過咗一日lu~~~原來BB出世第一日係day0, 今日先係days1!

早上龍寶寶比人收咗去沖涼同做聽力測試, 我就把握機會休息休息。11點左右, 有姑娘問我今日出唔出院, 我話我有B鏈, BB唔係要留院觀察48小時咩?! 姑娘話已經抽咗血驗, 冇問題, 可以走~~~咁我話陣間問下老公先!

但估唔到, 唔夠半小時, 另一個姑娘同我講, 龍寶寶隻腳有聲?! 我問, 有聲? (心諗, 乜隻腳會有聲嘅咩???)。姑娘話兒科醫生檢查咗, 話隻腳有少少問題, 下午兩點要過去初生嬰兒部比嗰邊嘅醫生再檢查一下。即刻話, 我今日唔可以同龍寶寶一齊出院....同時又要擔心寶寶隻腳...
點會咁架?!

姑娘走咗後, 我馬上打比亞姨 (因為亞姨就係喺初生嬰兒部工作, 但今日佢放假...)。亞姨話可以好小問題, 又或者真係會做手術...吓?! 唔係呀麻....

2:30p.m.接走咗龍寶寶 (都冇時間同佢影過相, 唉~), 亞姨亦都有打過電話番醫院問, 話醫生檢查完都覺得幾明顯, 要等骨科醫生過嚟睇下。但當時已經4點多, 人地骨科醫生都好忙, 如果今日星期五睇唔切, 星期六日佢地番半日, 做完自己嘢就會閃, 好有可能星期一先過嚟同龍寶寶檢查....我唔想同龍寶寶分開咁多日喎....

到6點, 我同老公衝過去探龍寶寶, 原來五點幾骨科醫生已經嚟咗同埋覺得問題不大, 冇乜額外需要留意! 但都安排排期照超聲波同見多次骨科醫生! 好有機會明天可以出院~ 所以我今日都決定唔出院, 明天同龍寶寶一齊走!

講番醫院嘅墡食先, 食咗兩日早餐, 一日甜麥皮, 一日係粥, 味道都ok! 午餐一日肉餅, 一日係蒸魚, 仲有生果派!

由於龍寶寶去咗初生嬰兒部, 我都冇乜好做, 都係兩三小時人手按摩同擠下奶, 刺激下個乳房同埋瞓覺.....咁就過咗一日lu~~~

相關網誌:

產假第一天 @ 39weeks

產假第二天 @ 39weeks2days [Blogger Only]

 

產假第二天 @ 39weeks2days [Blogger Only]

2012年5月24日 (四)

今日準備去一田優惠日買skin care, 我次次都會係呢個時候大手入貨。因為我用開嘅KOSE / COSME DECORTE平時係唔會做節, 我會趁呢個優惠日多samples送時出擊!

不過, 我冇得去lu, 要搵老公幫我買, 點解?!

因為我...要去醫院生仔呀!!!!

龍寶寶喺5月24日上午出世了, wakakaka~~~~~

5月23日放產假第一日, 又收埋張high chair, 都有同龍寶寶講, 可以出世喇, 不過可以的話都等媽媽去埋一田先...

其實早幾日開始, 隔晚都有啲規律性嘅宮縮, 但唔痛同埋維持2~3小時左右就會完, 但5月23日晚, 出現以下宮縮時間:-

5月23日晚, 平均10分鐘一次:
20:30
20:40
21:12
21:17
21:22
21:31
21:42
22:03
22:12
22:20
22:29
22:42
22:58
23:14
23:24
23:34
23:53
5月24日零晨:
00:12
00:25
00:33
00:44
00:51
01:07
瞓著咗lu, 冇計時了~

其實我都有少少覺得怪, 因為都宮縮咗好耐, 但又唔痛, 所以我都冇同老公講, 淨係自己計低時間~

5月24日黎明 - 痛醒咗
05:20
05:29 + 見粉紅分泌
05:40
05:44 + 見更多粉紅連分泌
05:49
05:52
05:57 (已經好快變咗3分鐘陣痛)
06:00
06:03
06:05
06:08
06:11
06:13
06:15
06:20
06:23
06:27
06:30
06:33
06:35
06:40
06:43
06:48
06:53
06:56
之後keep住3分鐘陣痛一次

5:20a.m痛醒咗諗住都係急尿問題啫, 去完都諗住試下繼續瞓, 由於未係好痛, 但心情都幾緊張, 又去廁所睇下, 已經見紅了, 我覺得係時候喇, 跟手同老公講有啲肚痛, 唔知係咪龍寶寶想出嚟呢...。我又開始計時做紀錄, 好快已經5mins痛一次但都唔係好痛同有啲急, 完全可以接受! 我仲疴咗舊屎添, 好彩真係屎, 唔係就會喺屋企生仔! 老公6:30a.m.起身準備返工, 見我繼續痛, 但工作上今日又要起貨比人...佢都想返工, 有諗過同我一齊返沙田先, 有乜事就入威院~~~

但問題係, 我已經3分鐘痛一次, 我覺得有少少怪, 因為見好多人都係10-15分鐘痛好耐....我決定洗咗頭先! 7:00a.m.我打比亞姨 (在威院做護士), 我話我而家3分鐘痛一次, 亦由於都近預產期, 都叫我可以入院住下先~~大不了咪比人趕番出嚟!

早餐都食唔落就門搭的士由元朗到威院, 都搭咗差不多$200架! 上到7樓產前房, 大槪7:50a.m., 前面有兩個大肚婆等緊。佢地好輕鬆, 而我就開始越嚟越痛同急屎....[ 心諗快手啲啦, 我好痛喎 (我覺得都仲頂得住), 但都要繼續排, 老公就落番去整我嘅入院排版...乜咁煩架, 仲上上落落!

等咗半個鐘終於到我檢查, 姑娘問下我啲嘢就上床檢查, 一除褲已經見到鮮紅嘅血喺底底度, 姑娘用手探開咗幾多度, feel到佢探咗幾下:-

姑娘: "哎呀!"
姐姐: "係咪要床?!"
姑娘: "開咗8度, call落產房"
姑娘好似有問我唔痛嘅咩? 我話, 生仔就一定痛架啦, 我又冇經驗, 都唔知幾痛先為之生得.....

跟手我就喺張床度換衫, 個氣氛突然變得好似好緊張咁, 哈哈~~姑娘同姐姐其實都好好人, 叫我唔洗急, 唔好嚇親我, 又幫我執好我換出嚟嘅衫 (事後我發現, 姐姐竟然張我條底底上嘅護墊掉咗+用一個小膠袋入住)。

老公就同我一齊搭電梯落6樓產房, 入到去好似8:45a.m., 好快有人比笑氣我聞...咁我聽金金子話, 唔好蝕, 用鼻係咁索, 但點解聞極都咁清醒嘅?! 呢個時候, 我真係超級急屎+痛 (但我都仲覺得頂得住, 莫非我真係忍得痛?!) 

因為我有B鏈, 所以要同我打抗生素先, 係由一位實習醫生幫我打 (自從睇完"ON CALL36小時"後, 真係好怕啲實習醫生)。原先同我打左手手背, 打咗入去又話我隻手腫打唔到, 仲要打咗好耐添呀, 大佬! 我真係好急屎呀! 之後就打右手前手臂, 叫我放鬆, 佢都低能架, 我自己痛緊都知要放鬆啦, 我隻手根本都冇緊過, 打你就打啦, 事後兩隻手都瘀咗好多日都未散呀!

其實我打呢支抗生素真係多餘, 因為至少要生之前兩小時打仲要好似要打幾支以上才有效用! 不過好好彩, 一星期前去私家做檢查, 開咗抗生素比我, 咁啱7日嘅藥, 喺生之前一日已經食晒, 真係夾都冇咁準呀! 所以我都唔擔心~

終於打完抗生素, 已經係9:05a.m, 助產士又用手check吓下面啦, 已經開晒喇, 唔知係咪同我穿水呢, 佢又冇講, 但我又feel到有嘢流出嚟, anyway, 叫我一痛就試疴。呢個時候, 笑氣已經收走咗, 而我就問老公要入嚟陪產。原來都老公都未入得住嘅, 要等多一陣先!

其實我覺得啲笑氣都冇乜用, 冇聞過一樣, 不過有得聞都好過冇, 至少同時都有嘢發洩下出下力。

助產士教我以下幾個動作, 一痛就要:-

1) 上半身抬起
2) 下半身尾龍骨要提起少少
3) 雙手用力拉扶手發力
4) 至少閉氣6-7秒出力疴, 要換氣時要快同緊接, 否則BB又縮番入去
5) 雙腳要打開, 其實已經打到好開, 但要再打開少少的話, 咁你就要用力去hold住對腳
6) 做緊以上動作時, 唔好叫出聲, 否則又係冇力生

我已經冇叫, 因為我知叫出聲係晒力晒時間, 不過要同一時又痛又急屎嘅同時做齊以上嘅嘢真係幾難! 如是者試疴咗幾次, 佢地覺得ok喇, 就叫咗老公入嚟, 老公都好幫得下手, 佢扶住我上半身, 咁我就慳咗好多力唔洗自己出力, 專心下半身嘅力!

其實, 有時真係好無奈, 你又唔知自己疴咗幾多出嚟, 又feel唔到有嘢移出咗.....淨係知, 每次都有人同你講:

"係喇, 好叻呀!"
"差唔多, 好快喇"
"冇氣就換, 即刻接番度氣"
.......

不停咁重複痛 (我估1分鐘左右痛一次掛) 同疴, 當開始有啲眉目時, 好多位助產士來幫忙同鼓勵! 我估龍寶寶已經出咗頭仔時, 你會feel到有嘢卡住你下面, 但唔痛嘅, 亦都冇再宮縮嘅痛同急屎feel, 助產士亦都有講話唔洗再等痛喇, 就咁疴就ok了。亦都有位助產士推我個肚, 好快, 就聽到龍寶寶嘅喊聲, 好響! 嗰下真係好開心, 眼尾望到老公都見到佢好開心嘅表情!

龍寶寶有3.13kg架, size我好滿意, 呢個size最好生!

我覺得威院嘅助產士好好, 龍寶寶一吸完啖, 遞比我睇係男定女, 數手指腳指, 又比我摸一摸龍寶寶! 我又話要影相又好好同我地影咗幾張, 我都唔明我生仔生得咁清醒....!!!!!!

生完冇耐, 老公就要閃人喇, 佢就去食早餐先~

我就要係產房聯針同休息一小時才上8樓產後房! 我個人覺得聯針比陣痛還要痛, 嗰種比針銡嘅感覺真係唔好受, 雖然打咗焗部麻醉針同有笑氣聞, 但某啲位都係幾痛架!!! 

至於龍寶寶就入咗保溫箱, 佢好精靈呀, 係度左望右望。唔知過咗幾耐, 有位助產士問我試唔試下餵人奶, 我話餵呀! 因為之前去健康院上母乳硏習班話BB一出世頭一小時係最清醒, 呢個時候比佢啜係令佢更容易識得食人奶嘅, 我同龍寶寶係咁一齊咗大半個小時呀, 而且龍寶寶啜得好叻又好大力!!!

唔知點解等咗好鬼耐, over 1小時先有人嚟接我上8樓! 但臨出去前又發現我個傷口仲有血滲出, 又話要同我再聯喎, 我嗰下真係有少少暈。佢地又比笑氣我聞, 真係比我聞到暈暈地, 但唔知點解, 一有暈嘅感覺我就會攞走唔聞, 總係覺得好不安咁, 但唔聞又好怕痛喎, wakaka~~~

一出到去, 見到老公係6樓等我, 真好, 又可以見到老公..... 

上到8樓產後房, 姐姐一路係咁推呀推呀, 我心諗, 推入啲啦, 我唔想瞓近走廊呀, 又光又嘈.....

估都估唔到我可以瞓最入嘅窗口位呀, 我真係好開心呀!!!! (我怕嘈又怕光架嘛, 不過都冇乜所謂嘅, 因為要自己照顧番BB其實都係冇得瞓~)

上到去, 已經係12點探病時間老公又可以即刻嚟陪我, 真係好呀!!! 老公就幫我執啲嘢出嚟啦, 將水泡吹氣, 焗炒米水.....跟住又派飯, 又可以食下嘢, very good呀!!!

生完頭6小時係唔可以落床嘅, 仲要疴夠尿先pass! 其實我一早都想疴啦, 由7點出門一路到生完都有幾小時冇去過廁所....不過都拖到3點左右先疴, 啲尿多到呢, 所以大家生完後要飲多啲水, 疴唔夠尿係唔比你落地同有機會插尿喉~~~然後姐姐幫你換姨媽巾, 再休息一下!

大槪5點, 姐姐又過嚟同我行一圈, 因為生完後落地會暈, 所以一定要有人陪架, 大家呢一點要留意!

落地冇暈, 就推番香噴噴嘅龍寶寶比我喇, 陣間5:30p.m.探病時間, 親友就可以見到BB啦! 自己個囡, 點睇都咁可愛, wakaka!!!!!

總結, 我覺得陀同生龍寶寶都好舒服, 陀又舒服個肚又冇爆紋, 懷孕過程又食得瞓得疴得行得, 生又快又唔痛, 老公又可以陪產, 我可以敢同人講十級痛都不外如是啫 (對我嚟講), 係咪串咗少少呀?! 不過我真係覺得呢種痛係完全可以接受囉, 唔似睇戲咁, 見啲人痛到就嚟死咁~但都要多謝龍寶寶鍚住媽媽嘅!!!

而私家嘅檢查都好準, 一星期前產檢照超聲波, 從胎水嘅份量好足, 推斷我嚟緊嘅一星期都唔會生住, 估唔到第八日就生, 準到呢!!!!

其實呢編blog, 由出院到今日, 已經打咗一星期, 但有時真係好倦, 雙眼望住電腦好乾, 所以都係上床休息, 因為夜晚得我一個湊, 有時都幾辛苦架....又要泵奶餵奶換片....一日24小時好快過!!!! 請大家見謜~~

相關網誌:

產假第一天 @ 39weeks