終於都到我做唐氏檢查喇! 約咗15:15到威院, 係公司食完晏就起行, 去到都係14:45左右, 磅一磅重就坐低等! 睇晒所有BOARD都唔見有咩產前班報嘅?! 不過算啦, 要請假嘅都未必會參加!
一路等都有少少緊張架。等咗半個鐘叫我名入房見姑娘, 問咗我一啲個人同家族健康問題。又問我可否抽多少少血比中大做硏究, 當然冇問題啦, 反正都要抽架喇, 可以多D血做實驗, 對大家同將來都有好處, 係咪?!
好快就叫我入另一間房, 原來唔係醫生照嘅, 不過我都冇所謂, 有經驗嘅姑娘有時仲可靠過D醫生架, haha~~~~
姑娘一照落去, 已經哎呀咁聲, 龍寶寶個位置唔啱呀! 打橫瞓背向天, 咁嘅姿勢係照唔到個喎, 我頭先唔記得咗叫龍寶寶要乖乖, 擺個靚姿勢呀!!! 姑娘係咁用支超聲波捧狂郁我個肚, 又叫我個身左右係咁轉, 希望佢會轉姿勢。點知.....都係零反應, 姑娘叫我去抽血先同郁多d!
去到抽血中心, 竟然冇人唔洗等, 記得好耐之前去抽血, 早上要等一個鐘架, 原來下午去醫院做檢查會好d嘅....唔洗10mins又上返去, 全程我都冇坐低過, 行樓梯上落, 希望龍寶寶轉姿態, 等咗10mins又到我!
我地又見面喇~~~
今次龍寶寶轉咗位喇, 係打橫瞓面向天, 姑娘話咁樣好過頭先啦~~~姑娘嗱嗱聲度咗頸皮先, 應該都度咗5-6次, 話口未完, 龍寶寶連續做咗幾次蜈蚣彈, 好開心呢見佢係咁郁, 但就比姑娘話曳曳囉, 我心諗, 咁咪似我囉, 古靈精怪, wakaka~~~彈完一輪佢就正常返, 有時見佢好似食手指, 但唔太肯定, 因為佢隻手去到個口位置就冇畫面睇, 但見佢個咀係有郁郁下咁, 應該係食手指掛~~~~兩次加埋照咗有半小時以上, 真係抵到爛呀!
最衰姑娘唔比我影相啦, 我見之前有人去威院都比嘅, 冇計~~
今日度出嚟龍寶寶有13w2d / 7cm長, 比前兩星期大咗3cm呀!!!叻叻
! 問咗姑娘頸皮厚度係呢個週數係正常, 冇記錯應該係1.96mm, 只要驗血嗰邊收唔到電話打嚟就冇問題架喇。最後姑娘比埋個照結構期比我, 真係好呀, 唔洗問都有, 好開心呀, 可以慳番千幾蚊, yeahyeahyeah!!!!!攪掂晒都成5點喇, 跟住回娘家食飯~~~
媽媽煲咗一大煲牛尾湯比我飲呀, 好好味好開心呀!!!!!
9月24日體重: 114.2lbs / 32.5"
10月22日體重: 114.2lbs / 33.5"
11月7日體重: 115.6lbs / 33.5"
11月25日體重: 119lbs / 34-1/8" (點解突然間重咗咁多嘅???!!!)
(P.S. 肚圍當中有2" 為肥膏)
10月22日體重: 114.2lbs / 33.5"
11月7日體重: 115.6lbs / 33.5"
11月25日體重: 119lbs / 34-1/8" (點解突然間重咗咁多嘅???!!!)
(P.S. 肚圍當中有2" 為肥膏)
其實如果做左婚前檢查~有左後係咪都要再CHECK唐氏?
回覆刪除[版主回覆11/26/2011 07:44:53]絕對要做架。因為佢係直接同bb量頸皮，同埋呢個病變好似係染色體出咗問題，所以婚前檢查係驗唔到！一定要照超聲加驗血先準，所以所有政府都有免費檢查，至於結構性檢查就唔係間間都有喇，如果你心儀政府醫院冇得提供，你知道有咗後就快快book私家係20~24週內檢查（$1500~$2500），出面好爆架！
你都好丫.. 佢比你睇, 我去廣華照, 個DISPLAY向住前方, 好彩嗰次老公有去, 佢總算睇倒, 但我點側頭, 都睇唔倒, 激C..
回覆刪除[版主回覆11/28/2011 15:09:19]佢有部大電視比你睇，都幾好。如果比我影埋相仲perfect :p
個姑娘好好人啊，仲安排埋結構比你，慳返唔少呢!!!
回覆刪除我上次係醫生做，我問佢度到幾多佢都唔肯講 u_u
[版主回覆11/28/2011 15:10:53]其實個姑娘都冇同我講有幾厚，個數係我自己睇，佢淨係話正常。而家咁睇，威院係包照結構，唔洗問都會有^^
yeah，又過一關啦！真係好呀，我係PMH問都未問，姑娘就已經話full晒呀.... 慳返d錢，又可以買多d野比龍寶寶！
回覆刪除[版主回覆11/28/2011 15:11:59]慳咗嘅錢已經洗咗落媽媽度喇，不過都係因為有咗佢才需要買嘅，wakaka
Bb彈彈一定好活潑
回覆刪除[版主回覆11/28/2011 20:24:55]同一樣整古做怪，不過見佢郁真係好開心！