好快又過咗一日lu~~~原來BB出世第一日係day0, 今日先係days1!
早上龍寶寶比人收咗去沖涼同做聽力測試, 我就把握機會休息休息。11點左右, 有姑娘問我今日出唔出院, 我話我有B鏈, BB唔係要留院觀察48小時咩?! 姑娘話已經抽咗血驗, 冇問題, 可以走~~~咁我話陣間問下老公先!
但估唔到, 唔夠半小時, 另一個姑娘同我講, 龍寶寶隻腳有聲?! 我問, 有聲? (心諗, 乜隻腳會有聲嘅咩???)。姑娘話兒科醫生檢查咗, 話隻腳有少少問題, 下午兩點要過去初生嬰兒部比嗰邊嘅醫生再檢查一下。即刻話, 我今日唔可以同龍寶寶一齊出院....同時又要擔心寶寶隻腳...
點會咁架?!
姑娘走咗後, 我馬上打比亞姨 (因為亞姨就係喺初生嬰兒部工作, 但今日佢放假...)。亞姨話可以好小問題, 又或者真係會做手術...吓?! 唔係呀麻....
2:30p.m.接走咗龍寶寶 (都冇時間同佢影過相, 唉~), 亞姨亦都有打過電話番醫院問, 話醫生檢查完都覺得幾明顯, 要等骨科醫生過嚟睇下。但當時已經4點多, 人地骨科醫生都好忙, 如果今日星期五睇唔切, 星期六日佢地番半日, 做完自己嘢就會閃, 好有可能星期一先過嚟同龍寶寶檢查....我唔想同龍寶寶分開咁多日喎....
到6點, 我同老公衝過去探龍寶寶, 原來五點幾骨科醫生已經嚟咗同埋覺得問題不大, 冇乜額外需要留意! 但都安排排期照超聲波同見多次骨科醫生! 好有機會明天可以出院~ 所以我今日都決定唔出院, 明天同龍寶寶一齊走!
講番醫院嘅墡食先, 食咗兩日早餐, 一日甜麥皮, 一日係粥, 味道都ok! 午餐一日肉餅, 一日係蒸魚, 仲有生果派!
由於龍寶寶去咗初生嬰兒部, 我都冇乜好做, 都係兩三小時人手按摩同擠下奶, 刺激下個乳房同埋瞓覺.....咁就過咗一日lu~~~
相關網誌:
產假第一天 @ 39weeks
產假第二天 @ 39weeks2days [Blogger Only]
BB無事嘛? 作為父母真係好擔心小朋友有事呀
回覆刪除[版主回覆06/08/2012 16:12:18]今日心情好好多，都係好小事^^多謝關心
[Mrs. Wu回覆06/08/2012 11:29:43]無野嘅, 唔好唔開心, 你唔開心BB感覺到架, 媽媽, 堅強D, 十卜你^_^
[版主回覆06/07/2012 13:07:05]其實我都冇問原因，因為知道咗後都一樣要面對。好彩係發現得早，大個先知仲衰！
[李太.大頭蝦回覆06/07/2012 12:43:21]點解無拉拉會甘???
咩原因??
(擔心c)
[版主回覆06/07/2012 12:26:25]噚日照咗超聲波, 左腳髋關節係有啲鬆, 骨科醫生建議著矯型褲, 其實都係好小事, 而家著就一勞永日, 但現時都係有啲D唔開心囉...
BB有事，最擔心都係我地....加油啊...媽媽!!!
回覆刪除[版主回覆06/08/2012 16:10:25]好在係著完後會完全冇事咋，咁就安心好多！
而家bb點呀??
回覆刪除[版主回覆06/16/2012 09:08:56]多謝支持！而家24小時都有人睇實佢，怕佢唔舒服又嘔奶
[傻瓜‧菲回覆06/16/2012 04:39:17]3個月後就咩事都無...唔駛擔心呀....小心d照顧就好了~~加油呀!!!!
[版主回覆06/14/2012 09:24:12]噚日去咗攞矯型褲喇，龍寶寶同我都要重新適應，雖然辛苦啲，但咁細個著效果會好好多！希望快啲著完！
Congratulations!!!
回覆刪除How's BB now? I hope everything is fine.
[版主回覆06/15/2012 17:35:22]著矯型褲3個月就會冇事~
龍寶寶加油...好快就好番...
回覆刪除[版主回覆06/15/2012 17:36:22]Yes ar!!!!
恭喜晒呀~醫院計係出世DAY0, 不過百日宴就計第一日DAY1
回覆刪除BB唔O係身邊要好好休息下, 返屋企冇覺好訓…
[小藍回覆06/17/2012 15:52:38]冇錯, 話咁快丁叮就黎3個月
[版主回覆06/16/2012 09:07:41]係呀，真係冇時間休息，啲時間快到咩咁！