5月媽媽會聚會! (3)

2012年8月24日 (五)

我地5月媽媽會真係好團結嘅啫, 我地勁到元朗, 屯門, 天水圍嘅媽媽再開個Whatsapps方便傾計, 真係日日傾到唔停口呀!

今日有媽媽提議食糖水, yeah, lets go!!!!

有人帶咗啲大少少嘅BB嚟, 佢地兩個好攪笑!

龍寶寶嘅傻豬樣~

時間真係好快呀, 一陣就坐咗個幾鐘喇, 又要散band lu~~~

相關網誌:

5月媽媽會聚會!

5月媽媽會聚會! (2)

 

 

腳腳覆診 2

**好耐冇update喇, 呢排真係好忙呀!!!!**



2012年8月1日 (三)

 

今日原本係我返工嘅日子, 但因為要同龍寶寶覆診, 所以請多一日假陪下我個愛女啦~~

 

約咗11:00a.m先去照超聲波, 同日下午睇兒科骨科。因為怕攪成日, 所以約咗公公喺醫院集合。

 

大家都好準時, 11點前到達, 登記之後就坐低等下啦, 原來好多小BB都係有同一個髋關節問題呀….真係唔講唔知喎~~好快脆就到我地啦, 龍寶寶都算乖, 雖然都有喊, 但都係細細聲, 仲斟咗杯茶比醫生添, 呵呵~~

 

醫生話右邊都有鬆, 今次照就正常番 (但上次照都冇話右腳有事….) / 左腳就話甩胶添….咁誇?! (上次明明只係話有啲鬆架?!) 一路上都唔係咁講個喎!

 

都未夠12點都攪點喇, 我地先回沙田娘家, 食個午飯, 餵奶同泵奶。時間啱啱好, 3點前又要出發到醫院!

骨科約咗3:30p.m., 經過上兩次嘅經驗, 要等差不多兩小時, OMG!!! 正當我地想眠一眠時, 竟然聽到龍寶寶個名喎, 仲以為聽錯或者同名呀, 望下個鐘, 只係3:25p.m.咋, 都未夠鐘就到?! 有冇咁快呀~~~

 

入到去見醫生, 好緊張呀! 會唔會有好消息呢?!

 

醫生print番份超聲波report出嚟, 數據顯示, 左右腳都好好, 兩隻腳受壓後都over52%, 只要over50%就叫正常。醫生話冇問題架喇, 可以唔洗再著呢套”蛙式支架”, 我同爸爸都好開心呀!!!!!!

 

因為只係著咗7星期, 物理治療師話, 根據以往紀錄, 未見過著少過三個月, 上次覆診聽到有個BB著咗兩個半月已經開心到飛起, 我都只係希望能著少一日得一日, 完全冇諗過7星期就可以重生, 實在太好了, YEAH!!!~~~~

 

醫生都好好, 約咗11月再同龍寶寶照多次超聲波, 約埋期, 攪晒所有嘢都係4點咋, 好快呀!!!

 

之後就同爸爸各自回家了~~

相關網誌:

髋關節

腳腳覆診

換腳套~

貓頭鷹?!

大槪7月中, 龍寶寶個半月大左右, 我已經開始同龍寶寶戒夜奶, 成績都唔錯, 12:00a.m.前最後一餐奶, 可以瞓到6:00a.m., 再頂到6:30a.m先飲第一餐奶~~

 

但去到7月底, 有幾晚瞓咗一陣就叫叫下, 咁我就抱起佢再暗過又瞓番直到天光~

 

不過, 由8月1日除咗矯型褲後……..嗰晚佢大喊, 抱住就瞓到豬咁, 但我郁少少佢就醒, 都莫講話放落床呀。如是者抱到3.4點先可以成功放落床唔喊之餘仲繼續瞓。可憐嘅我, 我第二朝仲要返工架, 乖女。

 

冇計啦, 可能唔慣, 話晒矯型褲都cool住咁耐, 而家一下子咁鬆, 又係會冇咗啲安全感嘅…..就係咁….一連幾晚都唔願瞓。我真係超級堅眼瞓囉, 試過比爸爸抱下, 但爸爸自己都唔"用心"去照顧, 攪到龍寶寶仲越喊越大聲, 想瞓一陣都好吖, 但個女喊我真係一啲都瞓唔到喎….

連續個幾星期都係咁, 半夜唔瞓, 你睇下佢幾大隻眼?! 已經係3點幾喇….

 

有時過, 佢喺張床度喊, 咁我去睇下佢啦, 龍寶寶見到我時, 即刻收聲, 又笑又了你傾計嘅樣, 真係冇時佢符….

手模腳模

媽媽會內好多媽媽同BB做手腳模, 亦都有介紹上門做嘅資料...比錢人做都係$800, 唔算貴!

我都想整呀! 好想留住呢一刻, BB大得好快呀!!! 不過我揀自己整~

之前買咗呢款~

先做隻手, 龍寶寶瞓到豬咗, 完全唔知咩事~~~

都算幾成功, 不過指甲位有啲氣泡, 唔夠完美!

第二日整腳, 龍寶寶醒咗, 係啲泥漿度係咁郁, 幾驚total loss呀~~

隻腳出嚟都ok, 最衰係啲腳指貼住個盆邊, 所以啲腳指頭平咗, haha~~

雖然手同腳模都唔完美, 但都係我兩公婆自己親手整, 都幾回味同幾好玩!

相關網誌:

3D 手模腳模

第四次健康院檢查

2012年7月24日 (二)

7月23日晚打風, 好驚打針會取消, 一取消又唔知要遲幾多喎....朝早一起身開電視, 話個風會掛多一段時間, 唔係呀嘛! 希望3:30p.m.前落啦, 咁我都仲可以去打針~ 好好彩8點幾就落波了, 唔洗改期! 老公仲因為打風唔洗返工同我地一齊去添, 好嘢~~~~

去到先登記, 磅重, 度高, 兩個月大嘅龍寶寶有5.18kg, 56cm長, 係生長線內, 好好呀!!!

等打針嘅豬樣, 今次要打四合一同13價, 呢兩針有機會發燒架, 所以爸爸就去攞藥, 我同龍寶寶就等打針~

第一針冇事, 冇喊, 第二針就喊咗幾耐下, 可能又肚餓, 喊上加喊!

打完針去咗食壽司, 好正呀!!!!!!!

不過元氣啲飯少咗好多, 好鬆散, 一夾就斷開喇, 而家乜嘢都貴晒, 加完價之餘仲要少埋份量...生活逼人呀!

回家後不停咁量體溫, 夜晚開始熱熱地, 有37.7度, 雖然未係發燒範圍, 但都係貼定退熱貼好啲, 因為都唔想食藥, 又想佢舒服啲。第二日再量都冇再咁熱, 變番正常36.6左右~

相關網誌:

第一次健康院檢查

第二次健康院檢查

第三次健康院檢查

完了~

最唔想嘅事終於都到了~

我要返工喇!

5月23日第一天產假, 咁快十星期就到了! 雖然我好好彩, 產假第二日就生, 多咗好多時間陪龍寶寶, 但眼見佢越大越多表情同反應時, 要你去返工....真係萬分唔想, 但實際上又唔可以唔做嘢, 好慘呀!!!!

7月開始, 已經儲緊冰奶...好可惜, 都儲唔夠30包~~

不過都好過冇!

唔知點解, 每儲一包就好開心, 好有滿足感。因為我唔係富媽媽, 人奶都係剛剛夠, 要儲幾日奶先有一餐多, 所以每包奶都有血有汗!

每包儲5安, 而家龍寶寶暫時食4安半, last嗰餐先5安~

好彩同事比咗4盒儲奶袋比我, 儲番唔少呀, 可惜暫時一盒儲奶袋都未用晒!