食粥粥

不經不覺, 龍寶寶已經6months17days!

由4個月左右, 心急媽媽已經比佢食米糊....開頭食兩下就扭眼瞓, 唔肯自己坐, 喊....比奶佢又肯飲仲瞓埋。明明安排好佢瞓醒先食米糊架嘛!!!!

如是者, 一到龍寶寶5個月就叫嫲嫲日日都比米糊佢食, 奶奶話佢好肯食喎...有冇攪錯?!我餵就眼瞓!!!!! 就係咁, 食咗3個星期米糊, 就決定轉食粥啦, 因為米糊比較熱氣同埋都只係for佢地練習學吞, 識吞就可以轉粥架喇!!!

頭一星期, 都只係原舊豬肉同啲粥一齊煲, 咁啲粥就會有肉味同豬肉嘅營養!

跟住我就快快手咁去買番個攪拌機啦, 因為奶奶都幾多嘢做, 為咗減輕佢同make sure龍寶寶食乜, 我會星期日攪定啲肉同菜, 跟住放入冰箱雪, 然後比奶奶, 每次佢就攞一粒出來就ok了!

暫時試咗好少食物咋, 食咗豬肉, 節瓜, 紅蘿蔔, 南瓜。下次星期會試雞肉 + 節瓜, 同一款新食物要連續食幾日冇敏感先叫OK! 雖然有啲悶, 但都唔可以太急呢....

剛過的星期日, 媽媽自己煲粥仔, 一個大人嘅碗, 係豬肉紅蘿蔔粥, 都幾杰架

食食下要飲水, 竟然肯自己攞住飲, 安慰!!!

食剩咗少少, 都OK啦, 都幾大碗架, 又有肉同菜。不過事後都飲咗3安飲

是日夜晚再接再厲, 今次係淨南瓜粥, 成碗食晒又飲咗3安奶, 媽媽好開心呀!!!!!!!



其實龍寶寶由三個月左右就開始曳曳, 4安奶都飲唔晒, 要瞓住飲就乘! 5個月大之前一路都係4小一餐奶, 每餐5安, 次次飲到兩三安就曳曳唔飲。激死我呀!!!!

後來去到5個月左右, 決定cut佢一餐, 我都唔想架但佢飲得咁慘, 我又餵到冇心機, 又唔想晒咗我啲人奶喎....但之後cut咗一餐及食粥仔之後, touchwood, 變得乖乖, 有時可以一口氣飲晒6安奶添呀!!!

龍寶寶要比心機呀!!!!

5月媽媽會聚會! (4) --- 6M Party!!!!!

 

2012年11月4日 (日)

又一個月冇寫blog喇!!! 啲時間快到呢.....

好期待嘅5月龍B 6m party!!! 足足籌備咗兩個多月時間, 好多謝咁多位義工媽媽搵贊助, 準備食物, 找場地, 包裝.....多到數唔晒!!!

為咗呢一日可以準時到達, 我由前一日晚就開始準備。執好咗龍寶寶要著嘅衫, 後備衫, 手巾仔, 又預早起身泵奶, 再泵多次先出門口。但去到都成12:15 左右, 原來好多媽媽都未到...仲驚死遲到添

同龍寶寶一齊喺poster前面影番張合照先~~~龍寶寶咁啱被安排係最上排, 好多想都見到佢架!

同blog友仔Tracy一齊係5月媽媽, 又可以gathering啦, 兩條友傾唔到,

妹妹豬同爸爸, 妹妹豬so cute, 面仔脹卜卜

今次抱咗妹妹豬一陣先喊, 有進步!

但另一邊, 我個女做乜咁嘅樣架?!

一齊合照!!!!!!

好多贊助呀, 大家見唔見poster入面嘅龍寶寶呀?!

仲有人人有份嘅抽獎添呀!

雖然抽唔到我想要嘅RODY, 但都抽到個煲仔來煲粥用, 都好!!!!

最後當然唔少得嚟番個大合照啦!!!

希望一歲又會攪PARTY啦

相關網誌:


5月媽媽會聚會!

5月媽媽會聚會! (2)

5月媽媽會聚會! (3)

我識反身喇~~

2012年10月4日／4months10days




真係估佢唔到咁快識反身！

我唔係讚我女叻呀~ 而係佢平時真係懶到出晒汁，淨係會大字型喺度嘆世界，側身都唔多！

其實朝早佢已經成功反咗半秒，但因為要返工，冇時間比佢再嘗試就要的佢去嫲嫲家了~

當晚回家後，大家又喺床上happy親子一下，佢異常咁努力反努力反！

如是者，成功了！

媽媽我當然好開心啦，立即同龍媽s分享一下喜悅！

呢啲嘢真係急唔嚟，要來就來。

還幸，呢個懶妹都唔係成日反，都係睇心情才反~~暫時唔洗成日看牛住！

食糊仔

2012年10月1日

龍寶寶已經夠咗四個月, 又係另一新階段, 開始多口水同食手手, 意味住要食下固體食物??

經過上次健康院姑娘話五個月才比糊仔，已經取消了呢個念頭~~但因為國慶，千色做9折，見到美國有機糊仔都有折，分幾個時段比寶寶食嘅糊仔。第一階段係比四個月大嘅BB,忍唔住就買啦~

即日回家試試~按指示，第一次試食應30ml奶+一湯匙。仲有一套朋友送嘅餐具, 開埋嚟用先~

按指示份量開出嚟好水呀~~~都照餵啦！點知扭眼瞓，喊喊，唔肯自己坐high chair, 抱住餵，食咗一半左右啦！就餵番奶暗佢瞓！
(明明頭先瞓咗個幾鐘！)

第二日又再餵，又係扭眼瞓，唔肯坐...又喊...

如是者，第四次試食好多了！開杰啲好餵啲，龍寶寶反應雖然冷淡啲，但都好過抗拒型，係咪？！

加油呀！

第五次健康院檢查

2012年9月24日 (一)

今日龍寶寶4個月大喇! 又係去打針嘅時候了~



朝早飲完奶準備出發~

今次去元朗嘅健康院，已經由沙田轉了過來~而且都好近屋企，你要知道元朗都好多大呢!!!

 我地準時9:00a.m.到達，登記後等叫名磅重。

四𠏋大嘅龍寶寶重6.13kg，比兩個月大時重咗1kg左右。原來龍寶寶身唔算高，所以佢呢個重已經好好。

見姑娘比咗一份有關食粥嘅書仔，可以考參下。原先好心急嘅我仲諗住一到四個月就比糊仔，點知姑娘話五個月先喎~~

今次同樣打四合一同13價，叫咗兩下就冇喊，叻叻！

跟住等打針，大概十點左右走Lu,前後一小時，都唔算耐！

回家後大家瞓咗一陣，12點的咗龍寶寶去嫲嫲家，因為我下午要去覆診，唔得閒湊佢呢~

相關網誌:

第一次健康院檢查

第二次健康院檢查

第三次健康院檢查

第四次健康院檢查

復工

((追post! 追post!))

一連十個星期好快就過喇, 8月2日第一日返工。老闆返嚟後, 點都要去打個招呼嘅~

講完近況吹夠水, 就要講返正經嘢啦~~

就係有關泵奶嘅嘢, 大家都開門見山, 我話我想泵兩次及想餵到6個月。老闆就話泵奶係私人嘢, 為咗公平起見, 如果喺office hours內泵奶, 就要OT補番, OK! 呢點我都明白~

老闆仲話, 只可以offer一個月比你喺office hours內泵奶 + 借一個月會議室。最後我揀咗喺lunch time泵 + 借會議室, 咁樣公司可以借兩個月會議室比我泵奶 (我唔記得點解lunch time泵就可以借兩個月了)。

老闆其實都有好多解釋架:-

1)  返工後會跌奶量

2)  遲早都要轉奶粉

3)  返得工就要放棄一啲嘢…..講咗好多嘢, 又話本身公司都冇呢啲offer架, 不過都體諒下, 所以借一兩個月會議室比我地泵奶喎。

其實老闆上年都生咗BB + 喺公司泵奶, 我知你係老闆可以點都得!!! 表面上就講到好明白餵人奶, 做媽媽 + 事業女性嘅難處~ 但我覺得老闆都只係企喺自己嘅立場而已!

其他嘅我唔講, 淨係借間房都只係借兩個月, 佢話你之後繼續泵嘅, 就要自己諗辦法, 可以係自己位泵奶都得喎! 其實間房lunch time都冇人用架啦, 借比我又有咩問題先?!  最多咪唔開冷氣囉 不過佢係老闆, 唔借就唔借架啦~~我亦都唔會去求佢, 亦都唔會偷偷地用佢間會議室!!!

其實, 我覺得佢唔想我地呢啲在奶媽員工掛住泵奶, 冇心機工作啫!!! 但我想講, 我返咗工後, 就係為咗準時放工回家泵奶, 我真係比之前更加勤力同高效率! 而家感覺上老闆唔多支持真係有啲心灰…

因為老闆唔support, 我就更加想餵人奶耐啲囉。我都決定咗, 兩個月後, 我會去廁所泵, 我知! 我知! 唔衛生嘛, 但我冇得揀呀! 而且我唔想就咁屈服囉~

最後我揀咗喺show room, 因為會議室冷氣壞咗.... (壞咗成年都唔整!)

第一日返工, 奶量當然冇影響啦~

泵媽要繼續努力呀!

搬屋

上次龍寶寶由婆婆家搬番自己屋企都攪咗我好幾日……而家又要一家三口再搬~

早喺5月中, 業主已經通知完約後要賣樓, confirm咗9月頭要交樓。7月底搬回家後就去睇樓, 住開附近嘅盤少到得番幾個….我地都是但, 睇咗兩間就決定了~~

終於8月4日攞咗鎖匙, 就開始了螞蟻搬屋, 因為實在太近, 搵搬屋公司洗幾千蚊實在太唔抵, 而家新舊屋嘅租約都重疊咗大半個月, 有足夠嘅時間比我地慢慢搬, 慳番啲搬屋公司錢嚟抵番個屋租嘛!

8月5日將龍寶寶交比嫲嫲湊, 我同老公就去大清潔! 攪咗一個下午, 好倦! 收工!

8月12日同19日折咗兩個衣櫃, 攞咗啲冬天衫, 唔用嘅雜物, 仲搬咗個鞋櫃添過去先。原來比我想像中多好多嘢……..按計劃, 應該26日開始喺新屋住了!

不過而家啲租真係好貴, 新嘅屋實用面積仲細少少, 間格又有少少怪, 張摺枱都冇位擺….唉! 住落習慣咗應該冇問題嘅….唯一好處係, 新屋再近少少奶奶家, 快一分鐘左右, 哈哈~

8月26日如期搬搬搬, 大槪12:00p.m.開始, 到6:00p.m.搬晒所有嘢過去, 辛苦晒老爺, 細佬同弟婦幫忙!

而家仲好好多雜誌亂咁塞, 仲未重新歸位! 又要忙番一日半日啦~

新屋我同龍寶寶都瞓得唔錯, 反而老公就話瞓得冇咁好, 真係估佢唔到呀!

第四次與blog友仔見面

2012年8月25日 (六)

超開心囉!!!!

對上一次同Blog友仔gathering已經係4月底嘅事。嗰時我同慒朱朱都未生, 去咗探金金子同小妤~~ 之後我同慒朱朱都生咗BB, 大家都好忙!

時間一轉, 已經係8月底喇, 我地要出動啦! 今次仲加埋小宅k同佢個龍仔大爺一齊gathering, 好開心呢~~~

龍寶寶: 我靚唔靚呀??

最衰我星期六要返工, 放工趕回99家接番龍寶寶再回家泵奶。仲要執一執個樣又要同龍寶寶裝身, 成3點幾先出門咋, 遲到啦。慒朱朱喺兆康西鐵站等我一齊出發到沙田, 去到已經差不多4點半喇!!!

小宅k&大爺

慒朱朱&妹妹豬

金金子&小妤

我&龍寶寶

真係超開心囉!!!!!個幾鐘真係完全唔夠喉呀!

要encore!!!!!!!!!!!

最後我地嚟個大合照, 交換龍B抱住嚟影相, 大爺因為用緊咩帶, 就唔好郁佢喇, 下次EE抱你吓!

小妤真係好重呀, 抱咗一陣頂唔住呀~~

妹妹豬比我抱到狂喊, 勁唔好意思呀, 對唔住呀!!!

今次抱唔到大爺, 下次我唔會放過你架。

我覺得我地幾個龍B都好可愛呀, 哈哈~

散band後, 返咗娘家探下公公同婆婆先~

沖完涼仲換咗套靚衫添呀~

大槪9點半就閃lu.....真係倦屎我呀! 超級眼瞓囉!!!

相關網誌:

與blog友仔見面

第二次與blog友仔見面

[Blogger only] cordlife 講座

第三次與blog友仔見面

 

5月媽媽會聚會! (3)

2012年8月24日 (五)

我地5月媽媽會真係好團結嘅啫, 我地勁到元朗, 屯門, 天水圍嘅媽媽再開個Whatsapps方便傾計, 真係日日傾到唔停口呀!

今日有媽媽提議食糖水, yeah, lets go!!!!

有人帶咗啲大少少嘅BB嚟, 佢地兩個好攪笑!

龍寶寶嘅傻豬樣~

時間真係好快呀, 一陣就坐咗個幾鐘喇, 又要散band lu~~~

相關網誌:

5月媽媽會聚會!

5月媽媽會聚會! (2)