.......真的嗎?
就這樣分開了嗎? 不是很愛對方嗎? 感情真的這樣兒戲嗎?
由傳聞一開始, 我就抱著"流料"花邊新聞來看, 總覺得有人"唔抵得"! 硬要作故仔來做新聞要銷量! 但當一本兩本三本雜誌都有同一個話題出現....就覺得"空穴來風, 未必無因"。
我不是他們倆的fans...但我真的有祝福過他們!
為何捱得過淫照, 郤敵不過時間! 還是, "事件"從沒解決?!
可憐的一對小孩兒....他們成長得會開心嗎?
還記得當初他們結了婚的消息傳出了, 有相士學家已經批了大少爺會有多過一位的母親; 兩夫婦亦有相沖....噢....真的這麼準?!
希望他們每一位將來的日子都過得很快樂....
我們的愛又可以永久嗎? 希望我能做到"互相體諒, 將心比己!"
2010年7月1日
轉下眼就第二日喇!
噚日嘅溫泉酒店瞓咗一晚就要走lu, 離開登別, 出發去KURORO渡假酒店。呢間酒店冬天係滑雪場嚟架!
早餐求其食少少嘢就出發去士多啤梨園, 即摘即食! GOGOGO~~~
摘咗好多呀! 真係堅甜堅好美呀~~~~
轉個頭就去洞爺湖影個相相留個念又閃人喇! 下一站係....
熊牧場.....第一次去, 都幾失望架, 個場好細同幾臭下...
中午去魚市場食飯~~導遊介紹只此一家Q10最耍家, 我都有買....感覺呀?? 都OK嘅, 因為我都唔識分, HEHE!
隻長腳蟹好大....隻呀!!!!!
我地買咗呢d加料!!!!有1隻長腳蟹, 2隻赤貝, 2隻帶子~正呀!
好多肉呀!!!呢度KO咗我地HK$2XXX呀, 不過真係物超所值!!!!!
跟住仲有加插行程, 導遊帶我地去白の戀人Shopping center, 呢個6,7月佢地種咗好多花比遊客影相, 我地就多咗個地點影下相喇, hohoho~~~
大槪5點幾, 就要坐車去KURORO酒店喇!
酒店好大好靚呀.......!
相關網誌:
呢幾隻eye shadow我好鍾意~
單獨用又得, 一齊用化濃妝又得, 我結婚當日都係用呢幾隻色架! 等我介紹下佢地先:-
KOSE出品, 呢款係蝦肉色cream狀仲有閃粉係入面! 老實講, 真係比粉狀嘅眼影更long lasting, 通常我朝早返工化啦, 到夜晚收工都好有色架, 咁當然, 中間補一補 (補少少好喇!) 就已經bling bling番晒! 單獨用佢已經好夠平時返工夜晚去街~
呢款係粉狀都係KOSE嘅! 自選顏色再比錢買個盒, 上面係金啡下面係深啡! 深啡可用作眼線, 好多變化~
化眼妝最好先打層底先, 尤其係眼油多嘅人就更加必須! 打底有兩個好處: 1) 可以令你之後上嘅顏色更出色 2) 可以long lasting d, 冇咁容易化開變熊貓眼!
打底嘅色好多選擇嘅, 可以用番皮膚色, 好似上面嘅相, 搽咗之後有少少令身嘅啫! 我用呢個brand - the BALM係由一間本地化妝學校做代理嘅! 呢盒九色眼影大槪$250...
如果你想化濃d, 可以搵d同色嘅去打底。例如, 你主色係深綠色, 你可以搵番綠色嘅眼影粉薄薄咁打一層底再上主色, 一樣可以做到long lasting同令你嘅主色更出色添!
好喇, 打咗底之後, 我就on top加咗蝦肉色cream狀, 個色係好自然好百撘! 咁樣去街已經好靚好sharp架喇~
由上至下睇: 跟住我就再加金啡眼影先, 再濃d嘅就再搽多層深啡去加大眼型! 最後劃番條眼線就OK架喇!
2010年對我嚟講真係好有義意好忙好充實好期待...
2月情人節
4月去台灣影婚紗相 + 自己生日
6月中去迪迪尼
7月頭北海道旅行
9月過大禮 + 搵屋搬屋
10月結婚
11月老公生日
12月聖誕節
嘩嘩嘩.....真係好忙好正呀, wakakakaa~~~
講比人知都冇人信, 我同老公兩條友都未去過日本, 大家都奉獻咗第一次比大家
2010年6月30日
DAY 1 --- 7:30a.m.到達機場!!!
大半日都係航機上....小寶同行一齊返鄉下呀!
第一晚酒店係有成百年歷史嘅溫泉旅館, 我地瞓"他他咪", 正!
當晚係酒店度食buffet, 當然預咗唔會勁好食啦。食物種類都幾多, 味道都唔錯~
食完飯, 出去行下散步, 跟住返房換衫去沉溫泉, 沉到我暈駝駝...hehee~~
媽媽愛用新鮮食材煮比我地食! 攪到我地幾姐弟食到鬼咁嘴饞, 今次我都要考考自己嘅實力同打天才波!
下圖係土魷冬菇蒸豬肉, 豬肉係自己手剁架, 媽咪話用機攪嘅冇咁好味而且部機都未必乾淨! 所以我都係自己剁番, 味道都唔錯, 好味! 但唔似媽咪煮嘅味....下次會再努力!
上圖係魚肉煮蘿蔔! 用咗$36買咗一條鮻魚 (都幾貴) 但我真係唔鍾意買現成嘅魚肉, 冇味又唔彈牙 (到係媽媽囉, 因為由細到大食嘅魚肉都係媽媽自己整, 正!) 叫街市d人幫我起肉, 我就將魚肉剁碎再用手攪再撻佢幾嘢 (調味我用咗d胡椒粉, 粟粉, 雞粉), 跟住煎到佢金黃色然後切條狀備用!
咁個鮻魚頭呢?! 我就加d水由得佢慢慢煲d魚水, 用嚟做咩呢? 就係將d魚水餵番d白蘿蔔囉, 老實講, 你叫我比番個魚頭比魚舖確實唔想, 我比咗錢架嘛, 成條魚骨其實仲有好多肉架! 但留嚟煲湯又冇乜味....所以唯有煲魚水煮蘿蔔囉, 我嘅level只係諗到咁整! d蘿蔔真係要d時間先煮得淋, 煮淋後加埋d魚肉同中國芹菜調番個味, very good!
第一次係淘寶淘衫, 價錢的確唔錯, 淘咗6件衫, 3條褲都係RMB157.7 + HKD36 = HKD226, 淨係睇價錢真係冇得彈, 質量以呢個價錢都好acceptable添!
呢件係雪紡 --- RMB21, 講真著上去好怪, 粒鈕好cheap, 普通一粒白色鈕唔襯件衫架....老公仲話有D大陸feel添呀, 應該未必會著出街!
另一件都係雪紡 --- RMB23, 著上去好鬆好長, 或者留番有咗BB嗰時著...哈哈~
普通上衣 --- RMB23, 呢件我幾鍾意, 但如果有得試上身, 我未必會買囉, 不過呢個價錢著一季真係抵到爛!!!
呢件RMB18, 普普通通啦! 可以著出街!
RMB16.9, 呢件好窄, 其實都OK, 不過我肥咗少少....就逼D囉...
打低衫 --- RMB9.9, 衰在佢冇彈性, 著上去好逼, 又係可惜之作!
呢條legging --- RMB12.9, 我諗要小學生先著到, 褲頭得嗰20"又冇彈性, 整嗰個人都有問題, 冇可能著囉, 佢嘅命運可能會比我用嚟做公仔衫....BYEBYE!
呢條打底褲 --- RMB5, 還可...細條咗少少, 好彩買咗一條啫! 原先見咁平仲諗住豪買幾條架, 好彩好彩!
呢條褲 --- RMB28, 唉....質料同佢post嘅相好唔同都算! 但質料好薄, 試著完見到D車線位有D想爆想爆嘅感覺...都唔知掉好定著好...唉!
老公叫我改短佢, 但而家佢想爆線, 我真係唔敢著佢出街呀!
經過呢次, 真係有D驚係淘寶買衫, 但香港D衫確實越來越貴, 可能我太貪平啦, 下次再淘衫我會再搵下同留意下人地嘅comment先再考慮嗰間shop!但暫時要等等, 因為淘一次都幾晒神....
