北海道 - Day 2

2018-1-6

休息一晚後，第二日正式展開旅程

食完早餐出發🚌

🔖基本上咁多餐都冇影過食物相，因為電話比咗兩位大帝使用😛


第一站：

蝦夷民族商店街

完全感受唔到有咩咁民族風，唔緊要嘅，有雪就夠喇！


雪呀～～～

超興奮啊！

第二站：

摩周湖

🔖小插曲是，忘了帶兩位小主的🕶。剛才的商店街沒有小童的，幸好這裡的小店還有最後兩副，女裝都殺住先😅

商店的屋頂超厚雪，而且還未被開發，就等我們來吧，正呀！

超～級～爽～

第三站：

屈斜路天鵝湖+火鍋lunch

走馬看花，閃人！

第四站：

密室逃脫之網走監獄得意博物館

大人細路都開心。

因為環境真的好清幽、空氣好、人又少、而且一大片雪，十分正！

好耐以前，真的有人這樣逃獄的啊！

參觀一出來，又玩過！

晚餐，一般😛

食完飯，到酒店後面的滑雪場玩多陣雪先❄️⛄️❄️⛄️❄️

北海道 - Day 1

2018-1-5

時光飛逝⋯⋯來到10月中才補回年初的事項🤪

帶住兩個細去北海道玩❄️☃️，大條道理跟團。一大早就要起身出發到機場，去旅行當然好合作啦😍

兩位小朋友當然係最開心啦



指定動作🛫

補眠好重要😴


話說同一時間有兩班機到達，過關時間超耐囉🤦‍♀️

沿路上風光無限好❄️，真的好靚啊！

今次旅行團以道東為中心，冇記錯都成3點由機場出發，來到酒店都天黑了。

身體還未適應，確實幾凍🌬

中咗副流感

話說星期五朝早已有好輕微的咳、放學後就不停咳，咳唔停😷！

比佢食番平時食開嘅感冒成藥，但一連三日到星期日都冇好轉（中間轉過藥），食咗藥都不停咳！咳！咳！鼻水長流🤧，keep住有啲燒🤒，最高上到39.X，幸好精神好好，肯玩肯食！

去到星期日晚準備上床瞓覺，一路咳唔停仲咳到想嘔，精神一下子又變差了，1516去睇急症？夜診？還是明早去睇家庭醫生⋯⋯🤷🏼‍♀️

最後都決定去睇急症（因為啲夜診醫生實在太流），一出廳條友又鬼打咁精神，真係唔多想去，不過最後都去咗！

去到博愛醫院已12:20am，得一個醫生睇症，進度好慢好慢🐌，最後要3:xx先到我地👩🏻‍⚕️，等了3小時，照肺X-ray超勁快，唔洗等就有得照、又過了一小時再見醫生話肺有花係肺炎🤦🏼‍♀️，話要過屯門醫院兒科留院🏨，又再等⋯⋯⋯到了5:30先上白車🚑去到都6:00了。去到屯醫就好快上病房了，一路都唔洗等，我見姑娘另一位姐姐帶羊咩咩上病床換衫做準備⋯⋯好快都有後生女醫生做檢查話肺冇雜聲唔似係肺炎🙄，唔夠一陣又另一位醫生話聽到有聲係肺炎🤦🏼‍♀️🤦🏼‍♀️

7:00派早餐，食粥🥣，之後又一輪醫生巡房時間話肺炎打枝針先💉，仲要去抽鼻液、胃液同血🌡做種菌同化驗，轉個頭就被帶走了，返嚟喊到死死下🤣⋯⋯

好彩佢一路都好精神，心定好多！

醫生巡晒房，我決定極速飛㚏回家收拾收拾，來回個多小時，真係好快架喇！其間醫院打咗兩次電話☎️來，仲比電話📞同羊咩咩傾兩句添，媽媽已經好快架喇🏃🏼‍♀️💨💨💨，快到喺樓梯到仆一仆添🤪😳🙄。返到病房走廊都未轉彎已經聽到喊聲，眼淚臭涕成面都係，成塊面都濕晒😅，仲已經打咗針💉、同種咗豆豆！（唔怪喊到咁慘😅）

估唔到佢好乖冇攪過粒豆又冇話要拆走，好叻仔😘

入咗隔離病房，所有人都嚴陣以待！醫護人員嘅即刻裝備每天用量極高，好唔環保但又有咩方法呢？！

你睇下佢個得戚樣🤨

瞓得好冧😴！呢條友仔真係好乖，冇嘈要走、冇扭落地、好乖留係病床、仲瞓咗兩場晏覺👍🏼

好好彩，留咗一晚院就比出院回家🏠，再留多晚我真係好難頂（隔離床個妹妹已經留院三晚了，準備第四晚，仲未搵到源頭），我又掛住家姐又擔心老公攪唔掂（佢返工已經好倦了）。

臨出院有埋報告確診 —— 副流感！

一直對屯醫有偏見，因為一路都有好多不利消息傳出，但經過今次留院完全改觀，上至高級醫生下至姐姐每位都有禮有耐性，又會氹小朋友。治療step絕對冇hea做👍🏼👍🏼👍🏼。

而且政府醫院收費真係好平，咁樣兩日一夜只需$60，仲包6日抗生素，普通私家門診咁樣已經要$300+。不過急症$180都幾費同埋真係等得太耐😪

兩位小主們，麻煩你們要健健康康呀🎏

❄️🌨☃️ 北海道準備 （6）

報咗團，即刻去shopping 囉， 淘寶gogogo💨💨💨

（淘寶係大陸最偉大的發明，呢個金句應該大家都聽唔少同埋唔會有人反對😌）馬上分享一下戰利品先😁：

1）羊咩咩的滑雪服：

顏色係羊咩咩自己㨂嘅。有佢好鍾意嘅橙色，好colorful，¥60，運費¥10

入面係絨布又有防風裙，兩邊有小暗格可放酒店卡片或父母的聯絡方法，十分滿意。

兩位小主的滑雪服已有，不用再買，而且今次個團只有約1hr的雪上電單車活動，沒太多時間比你慢慢玩❄️，所以我都未必帶套滑雪服去了。而買這件外套比羊咩咩用意著喺羽絨外防風防水，因為他那套滑雪服是㚒乸衣不能分拆來著，另外1、2月的北海道是最凍的，如果落雪或好大風嘅，呢類型的外套是不可缺的！

2）買咗五指兒童防水手襪玩雪用：

羊咩咩手太細，帶五指好困難😅

Frozen ~ ¥20 （店主做優惠，一對包郵之餘仲減¥10，抵到爛）

🍄 ~  ¥28 (搵咗好耐，呢對應該算是最細size的五指手套）

3）仲淘咗對手襪比爸爸用，各方面都好滿意 ¥40

4）仲買咗幾對羊毛襪，三對大人四對兒童，共¥80

羊毛襪比較保暖透氣，著咗雪靴焗到出汗都唔會濕晒係入面，如果著普通棉襪出咗汗，係會up住唔會乾，這些都係賣戶外用品的sales、淘寶客服和一些買家留言所講的，係唔係真就要試過之知😝

5）仲有睇咗好耐，好認真咁選擇嘅雪靴：

¥78@， 同款不同色。鞋預大了1.5cm, 因為兩姐弟都係小肉腳，而且預留空間著厚身少少嘅羊毛襪。

龍寶寶試著後就話好舒服，連襪著了一陣就話好熱。我眼見實物都好滿意，而且唔太重；還有條脷係連著鞋身，可確保雪唔會溜入鞋內。呢對雪靴預佢地著足六日，所以防水保暖及舒適度三方面都好重要。但為了穩陣都會帶多對波鞋替換。

6）兩個小朋友之前一路都穿著Morley羊毛內衣，係幾暖但透氣度就唔太高：

去了戶外運動用品舖買了一些新科技保暖內衣，呢個型號是厚手，保暖度較高。店員教路，先著呢件保暖內衣 ➡️ 面衫 ➡️ 羽絨 ➡️ 防風防水的外衣就足夠架喇！

我自己就買了一件中厚手的保暖內衣（上次去東京滑雪場，因兩小主扭眼瞓太混亂遺留了），比厚手沖薄一點點，加埋Woolrich Parka 應該好足夠了， 期待🤟🏼

7）還買了保暖褲：

褲買了中厚手，稍微薄一點，到時會同佢地穿兩條褲🌬🌬🌬圖片價錢為公價，運動店會員有85折🤑🤑🤑

8）最後還欠爸爸的🕶，那就一齊辦妥了

**旅程完結後會遂一同大家分享所有物資功效如何，始終我都是新手，不知會否太誇張或準備是否足夠**

❄️🌨☃️北海道準備（5）

成事喇🤟🏼

🎉🎉啱啱報咗個六日北海道團🌨，跟EGL, 淨團費$9699🎉🎉

六日嘅景點大至如下：

～北海道道東、十勝、阿寒湖、層雲峽、旭岳、小樽、札幌6天團～

蝦夷民族商店街、摩周湖靚景、屈斜路天鵝湖、零下41度冰雪趣緻館(天使魚及暢玩毛巾)、 
旭川雪之藝術結晶館、密室逃脫之網走監獄得意博物館、小樽運河、白之戀人朱古力趣緻城、狸小路商店街自由購物、OUTLET開心購物

（懶媽直接跟EGL預訂埋wifi蛋，$1500按金，$60@day，直接和領隊交收，超方便）

📌滿足了玩五日以上

📌一月去北海道，絕對夠晒玩雪整⛄️的時間

📌要美食有美食🥩🍣🦀、要shopping 有shopping💄👠👜

📌仲有冰❄️火🔥交融，我指浸♨️時上水落水時的感覺

一月頭出發，真係未出發先興奮！希望到時兩位小主生生性性，唔好再好似上次去東京咁成日扭計囉🙏🏼

繡/霧眉 + 脫疣

其實呢一項都唔知應唔應該放喺「Happy Beauty」內, 因為真係好很痛，一啲都唔happy😢😢😢

對上次整大約係10個月前，其中一條眉比較淺色，可能當時實在太痛，不停嘈嘈嘈，美容師都怕咗我⋯⋯

今次再嚟過，換咗舒緩膏，頭1/5時間係冇問題，唔痛的，但之後就越來越痛😫😫😫，不過我都死忍、死頂！

攪咗大半個鐘攪掂，又繡又霧，今次補色收半價$750

**真係好X痛😖😖😖**

美容師仲話我額頭有好多粒疣😭，一直都以為係暗粒、走粒。其實由陀羊咩咩時已經開始起，一路都認為皮膚個底差先會咁，原來係疣😫。電嘅過程有啲刺痛，仲有少少燶味，希望過兩日甩焦後可以正常面容見人啦😒。呢度電咗$400。價錢就好抵👻

繡眉脫疣後兩個多星期⋯⋯眉嘅顏色我覺得深了一點及欠了一點層次，同埋整個過程真係幾痛下，所以下一次再整都會去第二間試下😢

洗冷氣機 @ AIRESTEC

話說有一晚冷氣機超勁大陣霉味（其實久不久都會發生），是新買的用了約兩年；但都用得好密下，午覺和晚間一直到朝早8點左右，而且都差不多開足成年咁滯。咁我都有定期清洗隔塵網同用一些免沖水的清潔劑。但久不久就會傳出陣陣霉味⋯⋯有霉味都唔洗解釋一定係部機污糟先會咁啦！😖

於是，我就決定的起心肝找師父洗冷氣機，問了兩位師父，一係就勁遲覆（$600@，可能我話洗一部唔願so我）；另一位師父直頭冇回音😓。

記得之前上網和電視有介紹過一間AIRESTEC，佢比坊間洗冷氣貴$300@，洗一部$950（需另加$300服務費），洗四部就9定95折；另外，清洗完喺佢地嘅fb sharing番就total減$200。咁我決定洗住兩部先，因為都未試過洗，老公又牙痛咁聲⋯⋯

十月開始係洗冷氣機嘅淡季、好好彩我第二日就有期，可以快快脆攪掂陣霉味，話晒我兩個寶貝成日用架嘛！

開門見到兩位好年輕的師父，廿幾歲仔。好快手分工合作，有問有答，我同兩個細路成日穿插阻住晒都冇面路不悅😝

呢部舊機用了超過10年，咁多年來都只係用過免沖洗清潔劑噴下洗下，當中的灰塵已變成硬片（不過就未試過發出霉味）⋯⋯如果今次唔洗，我諗我下年都會換咗佢。不過師父話佢只有少少漏雪種，其他都好正常，比多次機會你啦😬

**順帶一提，AIEESTEC只係清潔，其他維修如加雪種係唔做嘅**

一位師父收起機殼入廁所沖洗，另一位就馬上開工！

師父會伸手入機內抺乾淨，再吸洗機葉！

一路吸已經即時見到效果，見番晒銀包金屬色，心情都即刻開心番！😃😃😃

另一部新機，機齡只係2歲，師父都話勁污糟！（相中已經抺走咗大部份灰塵）就係呢部經常發出霉味，日日吸細菌落肚，好惡心又可怕😖😫😖

一路吸一路爽丫丫的感覺😁😁😁，今晚有覺好瞓囉🤘🏻🤘🏻🤘🏻

好快就攪掂，最後噴埋保護膜及塗層抗菌防霉就攪掂啦！

洗兩部窗口式大約都係個寧鐘，真係好快，而且師父都執得好仔細，我都係吸一吸塵就當清潔完。

我會密切留意一下，是否真的可以keep到一年冇霉味🤘🏻

（師父就話，用咗佢地嘅抗菌防霉嘅塗層可以唔洗閂機前改凍風吹乾機內嘅水份，但如果有咁做，抗菌防霉嘅功效就可以long lasting 一啲，咁我都盡量閂機前做多一個步驟去減底我喺呢方面嘅開支）

最後，我個人覺得不論你搵哪間公司都好、但真的要定期清洗冷氣機囉。